Ájiniyaz atındaǵı Nókis mámleketlik pedagogikalıq institutı Dene mádeniyatı fakultetinde ashıq esikler kúni hám studentlerdiń ata-anaları menen ushırasıw bolıp ótti.

Ushırasıwda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov, fakultet dekanı A.Utepbergenovlar sózge shıǵıp, institutta jaslardıń oqıp bilim alıwı, tájiriybeli professor-oqıtıwshılardan ilim sırların úyrenip, óz bilim hám kónlikpelerin arttırıp barıwı ushın jaratılǵan sharayatlar haqqında maǵlıwmatlar berip ótti.

1956-jılı Qaraqalpaq mámleketlik pedagogikalıq institutı quramında jumıs baslaǵan dene tárbiyası kafedrası hám keyin ala fakultetke aylandırılǵan tálim baǵdarın usı kúnge shekem 5 mıńnan aslam qánigeler pitkerip shıǵıp, respublikamızdıń xalıq bilimlendiriw hám xalıq xojalıǵınıń basqa da tarawlarında jemisli miynet etip kelmekte.

Búgingi kúnde fakultette 3 jáhán chempionı, 8 Aziya chempionı, 150 den aslam Ózbekstan chempionı, 10 nan aslam xalıqaralıq dárejedegi sport ustası, 100 ge shamalas sport ustası jáne 200 den aslam sport ustalıǵına talaban bolǵan studentler bilim almaqta.

Fakultette dene mádeniyatı, hayal-qızlar sportı hám shaqırıqqa shekem áskeriy tayarlıq tálim baǵdarlarında ulıwma 800 ge shamalas studentler oqıp atırǵan bolıp, olarǵa bir professor, eki docent, úsh ilim kandidatı, on úlken oqıtıwshı, sonday-aq, 18 assistent-oqıtıwshıdan ibarat tájiriybeli professor-oqıtıwshılar tálim-tárbiya berip kelmekte.

Institutta jaratılǵan sharayatlar hám imkaniyatlardan nátiyjeli paydalanǵan fakultet studentleri arasınan Nawayı atındaǵı mámleketlik stipendiyalar tańlawınıń jeńimpazları, Zulfiya atındaǵı hám «Mard wǵlon» mámleketlik sıylıqlarınıń laureatları, «Úmit ushqını» kókirek belgileriniń iyeleri jetilisip shıqtı.

Ushırasıwda usınday joqarı nátiyjelerge erisip, oqıwda hám jámiyetlik jumıslarda belsendilik kórsetip kiyatırǵan bir topar studentlerdiń ata-analarına alǵısnamalar hám estelik sawǵaları tapsırıldı.

Ushırasıwdan soń ata-analar fakultette jaratılǵan sharayatlar menen tanıstı.

Ashıq esikler kúni ilajları hám ata-analar menen ushırasıwlar instituttıń barlıq fakultetleri kesiminde ótkerilmekte.

NMPI baspasóz xızmeti.