Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti Shavkat Mirziyoyevtiń Oliy Majliske hám respublikamız xalqına jollaǵan Múrájatı jáne onnan kelip shıǵıp ámelge asırılatuǵın jumıslarǵa arnalǵan ilimiy-ámeliy seminar bolıp ótti.

Seminarǵa fakultet dekanları hám olardıń orınbasarları, bólimler hám kafedralardıń baslıqları, professor-oqıtıwshılar, sonday-aq, tyutorlar qatnastı.

Ilajda instituttıń jámiyetlik pánler kafedrasınıń baslıǵı Yaxshibeka Abdullaeva, matematikanı oqıtıw metodikası kafedrasınıń baslıǵı Barlıqbay Prenov, sonday-aq, jaslar máseleleri hám ruwxıy-aǵartıwshılıq isleri boyınsha birinshi prorektor Quvondiq Qodirovlar Prezident Múrájatınıń mazmunı hám áhmiyeti, onda belgilengen tiykarǵı wazıypalar haqqındaǵı bayanatların oqıdı.

Seminarda atap ótilgenindey, mámleketimiz basshısınıń parlamentke hám xalqımızǵa jollaǵan Múrájatı Jańa Ózbekstannıń rawajlanıw perspektivaların óz ishine qamtıǵan baǵdarlama boldı.

Ulıwma altı baǵdardan ibarat bolǵan Múrájatta sońǵı jıllarda mámleketimizde insan qádiri, onıń mápleri hámme nárseden joqarı turatuǵınlıǵı, xalqımızdıń abadan turmısın támiyinlew tiykarǵı wazıypalardan biri etip belgilengenligi jáne bir márte bekkemlep berildi.

Usı wazıypalardan kelip shıǵıp, bayanatshılar tárepinen sociallıq-ekonomikalıq tarawlardaǵı reformalar, bilimlendiriwdiń sapasın arttırıw, sonday-aq, jaslar tárbiyası máseleleri boyınsha ámelge asırılıwı zárúr bolǵan jumıslar haqqında tolıq maǵlıwmatlar berildi.

Múrájatta Jańa Ózbekstandı «sociallıq mámleket» principi tiykarında qurıw baslı maqset etip qoyılǵanlıǵı, sonıń ishinde, insan potencialın júzege shıǵarıw ushın xalqımızǵa teńdey imkaniyatlar, múnásip turmıs sharayatların jaratıw, kámbaǵallıqtı qısqartıw maqsetinde birinshi gezektegi itibar bilimlendiriwdi qollap-quwatlawǵa qaratılatuǵınlıǵı atap ótildi. Mámleket basshısı búgingi kúnde eń úlken investiciya sıpatında qaralıp atırǵan bilimlendiriwdiń sapasın arttırıw – Jańa Ózbekstandı rawajlandırıwdıń birden-bir durıs jolı bolatuǵınlıǵına ayrıqsha toqtaldı hám kelesi 2023-jılǵa «Insanǵa itibar hám sapalı bilimlendiriw jılı» dep atama beriwdi usınıs etti. Joqarı bilimlendiriwde oqıtıwdıń sapasın arttırıw hár bir joqarı oqıw ornı jámáátiniń, professor-oqıtıwshılarınıń tiykarǵı maqseti bolıwı kerekligi atap ótildi.

Bayanatshılar tárepinen elimizde insandı ulıǵlaw, onıń arzıw-niyetleri, maqset hám umtılısların júzege shıǵarıw jáne qollap-quwatlaw, bilimlendiriw tarawında sapa kórsetkishine erisiwde orın alıp atırǵan mashqalalar hám olardı saplastırıw, jaslar tárbiyasınıń áhmiyetli máseleleri boyınsha anıq hám dálillengen pikir-usınıslar bildirilip, aldaǵı waqıtlarda birgelikte ámelge asırılıwı zárúr bolǵan jumıslar kórsetip ótildi.

Seminarda kafedra baslıqları, tájiriybeli professor-oqıtıwshılar sózge shıǵıp, Prezident Múrájatınan kelip shıǵıp tarawda islenetuǵın jumıslar boyınsha óz pikir-usınısların bildirdi.

NMPI baspasóz xızmeti.