Jańa jıl bayramı hár bir insan ómirinde jańa jobalar, jańa baslamalar, jańa ideyalardıń bosaǵası, sonıń menen birge, izde qalıp baratırǵan jılǵa juwmaq jasaw, jıl dawamında ámelge asırǵan hám isley almaǵan jumıslar, qolǵa kirgizgen jetiskenlikler hám jol qoyılǵan kemshiliklerdi ulıwmalastırıp, juwmaq shıǵaratuǵın, keleshekke jobalardı belgileytuǵın bayram ekenligi menen ózgeshelenip turadı.

Juwmaqlanıw aldında turǵan 2022-jıl Ájiniyaz atındaǵı Nókis mámleketlik pedagogikalıq institutı turmısında úlken nátiyjelerge tolı jıl boldı. Biz óz aldımızǵa belgilep alǵan oqıw procesi, ilimiy-izertlew jumısların rawajlandırıw, materiallıq-texnikalıq bazanı jetilistiriw, tálim-tárbiyaǵa ayrıqsha itibar qaratıw, xalıqaralıq baylanıslardı bekkemlew baǵdarında anaǵurlım tabıslarǵa eristik. Sonıń menen birge, orın alǵan ayırım mashqala hám kemshiliklerdi de unamlı sheshiwge jáne olardan durıs juwmaq shıǵarıwǵa háreket ettik.

Prezidentimiz tárepinen kelesi 2023-jılǵa elimizde «Insanǵa itibar hám sapalı bilimlendiriw jılı» dep atama berildi.

Bul, álbette, bilimlendiriw tarawına úlken itibar bolıwı menen birge, juwapkershilik te júkleydi. 2023-jılda aldımızǵa insan potencialın júzege shıǵarıw ushın xalqımızǵa teńdey imkaniyatlar jaratıw maqsetinde birinshi gezektegi itibarımızdı Jańa Ózbekstandı rawajlandırıwdıń birden-bir durıs jolı esaplanǵan bilimlendiriwdiń sapasın arttırıwǵa bar kúsh-jigerimiz hám imkaniyatlarımızdı jumsaymız.

Kirip kiyatırǵan jańa jıl hámmeńizdiń shańaraqlarıńızǵa amanlıq, mol ırısqı-nesiybe, xalqımızǵa tınıshlıq, paraxatshılıq, abadanlıq alıp keletuǵın jıl bolıp keliwin tileymen!

Húrmet penen,
Bayrambay Otemuratov,
Ájiniyaz atındaǵı Nókis mámleketlik pedagogikalıq institutınıń rektorı.