Ózbekstan Respublikası Ministrler Kabinetiniń tiyisli protokolı tiykarında 2023-jıldıń 11-yanvar kúninen baslap joqarı hám professional bilimlendiriw mákemelerinde hám akademiyalıq liceylerde oqıw procesi jergilikli hákimlikler menen kelisilgen halda basqıshpa-basqısh baslanıwı belgilendi.

Sonnan kelip shıǵıp, Ájiniyaz atındaǵı Nókis mámleketlik pedagogikalıq institutında oqıw procesi 2023-jıldıń 12-yanvar kúninen baslap dástúriy (oflayn) tárizde baslanatuǵınlıǵın málim etemiz.

Bul processti belgilengen tártipte ámelge asırıw maqsetinde institutta kúni-túni jumıs alıp baratuǵın, tájiriybeli qánigelerden ibarat “Shtab” shólkemlestiriledi.

Anomal suwıq bolıwı kútilip atırǵan 10-18-yanvar kúnleri barlıq oqıw orınları qatarında institutta da hár qanday májilisler (sonıń ishinde, ZOOM arqalı), ilajlar, juwapkerlerdi tiykarǵı jumıslarınan shalǵıtatuǵın basqa jıynalıslardı ótkeriw qadaǵan etiledi.

Sonday-aq, institut oqıw imaratlarınıń jılıtıw sistemalarınıń turaqlı islewi támiyinlenedi.

Oqıw procesin shólkemlestiriwde zárúrlikke qaray oqıw grafigine ózgeris kirgiziwge ruxsat beriledi. 20-yanvarǵa shekem studentlerdiń imtixanlarǵa tayarlıq kóriwi usınıs etiledi.

Juwmaqlawshı qadaǵalaw jumısları 20-yanvardan baslanadı.

Hawa rayı sharayatları sebepli oqıwǵa kele almaǵan studentlerge oqıw processlerin baslaw hám imtixanlarǵa tayarlıq kóriw boyınsha tiyisli aralıq baǵdarlamaları usınıladı.