Ájiniyaz atındaǵı Nókis mámleketlik pedagogikalıq institutında «Jawızlıqqa qarsı aǵartıwshılıq» atamasında studentler menen dógerek sáwbeti shólkemlestirildi.

Ilajǵa Qaraqalpaqstan Respublikası Ishki isler ministrligi janındaǵı Tergew basqarmasınıń bólim baslıǵı, podpolkovnik S.Nuratdinov, paytaxtımızdaǵı ál-Beruniy atındaǵı orta arnawlı islam oqıw ornınıń oqıtıwshısı J.Abdukarimov, institut profilaktikalıq inspektorı, kapitan B.Masharipov, Tábiyǵıy pánler fakulteti professor-oqıtıwshıları, tyutorları hám studentleri qatnastı.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp barǵan dógerek sáwbetinde sońǵı jıllarda dúnyada júz berip atırǵan informaciyanıń globallasıwı sharayatında jaslardı hár qıylı buzǵınshı ideyalar, ekstremizm, terrorizm sıyaqlı qáwipli háreketlerge baǵdarlaytuǵın maǵlıwmatlardan qorǵaw, bos waqıtların kitapqumarlıq, bilim alıw hám óner iyelew sıyaqlı ilajlarǵa baǵdarlaw máseleleri haqqında sóz boldı.

Búgingidey internet hám sociallıq tarmaqlardıń rawajlanǵan bir dáwirinde keleshek iyeleri bolǵan jaslarımızdıń sanasın túrli zıyanlı maǵlıwmatlar hám ideyalardan qorǵaw ushın eń aldı menen jaslardıń huqıqıy mádeniyatı, bilim dárejesi, turmıslıq tájiriybesi, dúnyaǵa kózqarası keń bolıwı kerekligi atap ótildi.

Sonday-aq, dógerek sáwbetinde jaslar arasında jınayatshılıq, huqıqbuzarlıq hám basqa da unamsız waqıya-hádiyselerdiń ushırasıp atırǵanlıǵı mısallar menen kórsetip ótilip, bunday jaǵdaylarǵa qarsı gúresiw, birinshi gezekte, olardıń mashqalaların úyreniw, birgelikte sheshim tabıw, túsindiriw, úgit-násiyat jumıslarınıń nátiyjeliligin arttırıw arqalı ámelge asırılatuǵınlıǵı jóninde pikir almasıldı.

NMPI baspasóz xızmeti.