Búgin, 31-yanvar kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Qorǵanıw ministrligi Málimleme-kommunikaciya texnologiyaları hám baylanıs áskeriy institutı wákilleri menen ushırasıw bolıp ótti.

Ushırasıwǵa instituttıń Fizika-matematika fakulteti matematika hám informatika tálim baǵdarınıń 3-kurs studentleri qatnastı.

Ilajda Ózbekstan Respublikası Qorǵanıw ministrligi Málimleme-kommunikaciya texnologiyaları hám baylanıs áskeriy institutı Intellektual sistemalar kafedrasınıń baslıǵı, polkovnik Dáwletmurat Jaqsımov studentlerge áskeriy instituttıń shólkemlestiriliwi, oqıwǵa qabıllaw procesi, ol jerdegi sharayatlar, qosımsha imkaniyatlar haqqında prezentaciya tárizinde tolıq maǵlıwmatlar berdi.

Házirgi waqıtta áskeriy institutqa 2023-2024-oqıw jılı ushın talabanlardı saylap alıw jumısları alıp barılıp atırǵan bolıp, bunda respublikamızdaǵı injenerlik-texnikalıq joqarı oqıw orınlarınıń 3-kursın pitkerip atırǵan, oqıw juwmaqları boyınsha joqarı nátiyjelerge erisken, oqıwın usı áskeriy institutta dawam ettirip, keleshekte shártnama tiykarında áskeriy xızmetti atqarıw niyetinde bolǵan, sonday-aq, densawlıǵı boyınsha áskeriy xızmetke jaramlı dep esaplanǵan talabanlar qatnasıwı belgilengen.

Ushırasıwda studentler ózlerin qızıqtırǵan sorawlarǵa tolıq juwap aldı.

NMPI baspasóz xızmeti.