Bıyıl elimiz boylap ullı mámleketlik ǵayratker, shayır, baburiyler dinastiyasınıń tiykarın salıwshı Zahiriddin Muhammed Baburdıń tuwılǵanınıń 540 jıllıǵı keń túrde belgilenbekte.

Ájiniyaz atındaǵı Nókis mámleketlik pedagogikalıq institutında sánege baǵıshlap ótkerilgen ushırasıwda orta ásir Shıǵıs mádeniyatı, ádebiyatı hám poeziyasında ózine tán orın iyelegen dóretiwshi, alım hám sárkardanıń ómiri, sonday-aq, bizge miyras bolıp qalǵan jazba estelikleri haqqında maǵlıwmatlar berildi.

Babur keń dúnyaqarası, aqıl-oyı hám sheber sárkardalıǵı menen Hindstanda baburiyler dinastiyasına tiykar salıp, dúnya tariyxında múnásip iz qaldırǵan bolsa, eski ózbek (shıǵatay) tilinde jazılǵan «Baburnama» shıǵarması arqalı dúnyanıń belgili tariyxshı ilimpazları qatarınan orın aldı. Onıń ǵázzel hám rubayıları túrkiy poeziyanıń eń belgili dóretpeleri bolıp, «Mubayyin» («Bayan etilgen»), «Xatti Boburiy», «Harb isi», aruz haqqındaǵı shıǵarmaları islam nızamshılıǵı, poeziyası hám til teoriyası tarawlarına qosılǵan úlken úles bolıp tabıladı.

Dúnyaǵa belgili «Baburnama» shıǵarmasında Mavoraunnaxr, Xorasan, Iran hám Hindstan xalıqlarınıń tariyxı sáwlelengen. Shıǵarma tiykarınan úsh bólimnen ibarat bolıp, onıń birinshi bólimi – XV ásirdiń ekinshi yarımında Oraylıq Aziyada júz bergen waqıyalar, ekinshi bólimi – XV ásirdiń aqırı XVI ásirdiń birinshi yarımında Kabul ulısı, yaǵnıy Awǵanstanda júz bergen waqıyalar, úshinshi bólimi – XVI ásirdiń birinshi sheregindegi Arqa Hindstan xalıqları tariyxına baǵıshlanǵan.

Ilajda instituttıń tariyxtı oqıtıw metodikası kafedrasınıń oqıtıwshısı Nodira Salomova, ózbek ádebiyatı kafedrasınıń docenti Hamza Allambergenovlar tárepinen Zahiriddin Muhammed Baburdıń elimiz hám dúnya tariyxı, ádebiyatı hám ilim-páninde tutqan ornı, bizge shekem jetip kelgen jazba miyrasları haqqında keń túrde maǵlıwmatlar berildi.

NMPI baspasóz xızmeti.