Ájiniyaz atındaǵı Nókis mámleketlik pedagogikalıq institutı magistratura basqıshı muzıkalıq tálim hám kórkem óner qánigeligi magistrantlarınıń «Quyashlı elimdi jırlayman» atamasındaǵı esap beriw koncert baǵdarlaması shólkemlestirildi.

Ilajda institut rektorı Bayrambay Otemuratov sózge shıǵıp, magistratura basqıshında bul qánigeliktiń ashılǵanına kóp bolmaǵan bolsa da, jaslardıń qolǵa kirgizip atırǵan nátiyjeleri joqarı ekenligin atap ótti hám olarǵa tabıslar tiledi.

Jaslardıń ruwxıy dúnyasın jetilistiriw, olardıń bos waqıtların mazmunlı ótkeriw maqsetinde Ózbekstan Respublikası Prezidenti tárepinen alǵa súrilgen bes baslamanıń birinshisi keleshek iyeleriniń muzıka, súwretshilik, ádebiyat, teatr hám kórkem ónerdiń basqa túrlerine bolǵan qızıǵıwshılıǵın arttırıwǵa, qábiletin júzege shıǵarıwǵa baǵdarlanǵan.

Usı tiykarda institutta kóplegen unamlı jumıslar ámelge asırılmaqta. Ótken jılı institutqa klassikalıq hám zamanagóy muzıkalıq ásbaplar, zárúr úskeneler alıp kelingen edi. Sonday-aq, talantlı jaslardı anıqlaw, olardı xoshametlew maqsetinde tańlawlar turaqlı túrde ótkerip kelinbekte.

Instituttıń muzıkalıq tálim kafedrasında respublikamız kórkem ónerinde óz jolına, bay potencialına, qádiriyatlarına iye professor-oqıtıwshılar jaslarǵa tálim-tárbiya berip kelmekte.

Álbette, usınday sharayatlar hám imkaniyatlardan nátiyjeli paydalanıp atırǵan jaslarımız arasınan respublikalıq hám xalıqaralıq tańlawlardıń jeńimpazları, «Nihol», Zulfiya atındaǵı mámleketlik sıylıqlardıń laureatları, xalqımızdıń júrek tórinen orın alǵan, Nawrız ulıwma xalıqlıq hám Ǵárezsizlik bayramlarında úlken saxnalarda óz qábiletin kórsetip kiyatırǵan kórkem óner sheberleri jetilisip shıqpaqta.

Koncert baǵdarlamasında magistrantlar ustazları menen birgelikte janlı hawazda qosıqlar, ariyalar, dástanlardan úzindiler, monologlar atqarıp, milliy, klassikalıq saz ásbaplarında oynap, jıynalǵanlardıń kewillerine zawıq baǵıshladı.

Ilaj sońında Qaraqalpaqstan Respublikası Mádeniyat ministri Qalbay Turdiev sózge shıǵıp, koncert baǵdarlamasınıń joqarı dárejede shólkemlestirilgenligi, jaslardıń atqarıwshılıq sheberliginiń tamashagóyler kewillerinen orın alǵanlıǵın ayrıqsha atap ótip, institut jámáátine, koncert shólkemlestiriwshilerine minnetdarshılıq bildirdi.

NMPI baspasóz xızmeti.