Ájiniyaz atındaǵı Nókis mámleketlik pedagogikalıq institutında 8-mart – Xalıqaralıq hayal-qızlar kúni bayramı múnásibeti menen barlıq fakultetlerde oqıp atırǵan student-qızlar arasında voleybol boyınsha jarıs bolıp ótti.

Institut sport klubı hám hayal-qızlar keńesi tárepinen shólkemlestirilgen ilajǵa 10 fakultetten komandalar qatnastı.

Jarıstı Dene mádeniyatı fakultetiniń tájiriybeli oqıtıwshıları baqlap bardı.

Qızǵın túrde ótken jarıs juwmaǵında Shet tilleri fakulteti student-qızlarınan dúzilgen komanda 1-orındı iyeledi. Dene mádeniyatı fakulteti komandası 2-orın, al Baslawısh tálim fakulteti student-qızları sıylı 3-orındı bántledi.

Sıylıqlaw ilajında institut sport klubı baslıǵınıń orınbasarı A.Erejepov, rektordıń hayal-qızlar máseleleri boyınsha másláhátshisi S.Bekchanova, profilaktikalıq inspektor, leytenant M.Narımbetovalar sózge shıǵıp, barlıq qatnasıwshılardı bayram menen qutlıqladı.

Jarıs jeńimpazları hám sıylı orın iyeleri diplom, medal hám estelik sawǵaları menen sıylıqlandı.

NMPI baspasóz xızmeti.