Assalawma áleykum, áziz hayal-qızlar – mehriban analar, húrmetli apa-qarındaslar!

Sizlerdi hám sizler arqalı elimizdiń barlıq hayal-qızların 8-mart – Xalıqaralıq hayal-qızlar kúni bayramı menen shın júrekten qutlıqlayman.

Hayal-qızlar – hárdayım shańaraǵımızdıń uyıtqısı, tirishiliktiń arqawı, baxıtlı demlerimizdiń tiykarshısı esaplanadı.

Sońǵı jıllarda elimizde hayal-qızlardıń bilim alıwı, ilim menen shuǵıllanıwı, qábiletlerin júzege shıǵarıwı, kásip-óner úyrenip, jámiyetimiz hám mámleketimizdiń rawajlanıwı ushın óz úleslerin qosıwına zárúr sharayatlar hám imkaniyatlar jaratılmaqta.

Búgingi kúnde institutta 600 ge shamalas hayal-qızlar ilimiy-pedagogikalıq hám hár qıylı juwapkerli jumıslarda jemisli miynet etpekte. Olar arasınan prorektor, fakultet dekanları, bólimler hám kafedralar baslıqları, professor, docent, ilim doktorları jetilisip shıqpaqta. Sonday-aq, institutta 13 mıńnan aslam student-qızlar keleshekte maman kadrlar bolıw ushın oqıp bilim almaqta.

Búgin usınday iygilikli jumıslarda belsendilik kórsetip atırǵan Sizlerdey pidayı insanlarǵa tájim ete otırıp, bekkem densawlıq, jumıslarıńızda mol tabıslar, otbasıńızǵa amanlıq, mol ırısqı-nesiybe, baxıtlı hám mazmunlı ómir tileymen!

Ózbekstan Qaharmanı, ullı shayırımız Ibrayım Yusupov jazǵanınday:

Aralıqtan túrli zaman keshse de,
Dástúrler ózgerip ayra tússe de,
Barlıq bayram kalendardan óshse de,
Siziń bayramıńız óshpegey, qızlar!

Sheksiz húrmet penen,
Bayrambay Otemuratov.

Ájiniyaz atındaǵı Nókis mámleketlik pedagogikalıq institutınıń rektorı.