Búgin, 29-mart kúni Ájiniyaz atındaǵı Nókis mámleketlik pedagogikalıq institutında Joqarı bilimlendiriw, ilim hám innovaciyalar ministri, akademik Ibrohim Abdurahmonov Qaraqalpaqstan Respublikasındaǵı joqarı oqıw orınları basshıları, professor-oqıtıwshıları hám student-jasları menen ushırasıw ótkerdi.

Ushırasıwda ministr sońǵı jıllarda elimizde joqarı bilimlendiriw tarawında ámelge asırılıp atırǵan reformalardıń nátiyjeleri, bilimlendiriw procesin sapalıq jaqtan joqarı dárejege kóteriw baǵdarında islenip atırǵan jumıslar hám aldaǵı wazıypalarǵa keń túrde toqtalıp ótti.

Búgingi kúnde hár bir joqarı oqıw ornında dúnyanıń jetekshi bilimlendiriw hám ilimiy-izertlew mákemeleri menen tıǵız birge islesiwdi jolǵa qoyıw, oqıw procesine xalıqaralıq bilimlendiriw standartlarına tiykarlanǵan aldınǵı pedagogikalıq texnologiyalar, oqıw baǵdarlamaları hám oqıw-metodikalıq materiallardı keń túrde engiziw, teoriya menen ámeliyattıń, ilimiy-izertlew menen óndiristiń birligin támiyinlew, zamanagóy oqıw, oqıw-metodikalıq hám ilimiy ádebiyatlar menen támiyinlew, joqarı oqıw orınlarınıń ilimiy potencialın bekkemlew, professor-oqıtıwshılardıń ilimiy-izertlew jumıslarınıń nátiyjeliligin arttırıw, qábiletli studentlerdi bul proceske keńnen tartıw, materiallıq-texnikalıq bazanı bekkemlew, oqıw hám ilimiy-laboratoriyalıq imaratlar hám korpusları, sport kompleksleri, studentler turaq jayları sıyaqlı infrastrukturalıq obektlerdi qurıw baǵdarında islenip atırǵan jumıslar ayrıqsha atap ótildi.

Ushırasıwda qaraqalpaqstanlı ilimpazlar, professor-oqıtıwshılar hám student-jaslar Joqarı bilimlendiriw, ilim hám innovaciyalar ministri Ibrohim Abdurahmonovqa tarawda ámelge asırılıp atırǵan jumıslardı bunnan bılay da jetilistiriw, jaslar baslamaların qollap-quwatlaw baǵdarındaǵı pikir-usınısların bildirdi.

Atap aytqanda, barlıq joqarı oqıw orınlarında jas shayır, jazıwshı, dramaturg sıyaqlı dóretiwshilerdi qollap-quwatlaw maqsetinde «Jas dóretiwshiler» klubın shólkemlestiriw, olardıń dóretiwshilik úlgilerin ministrlik qarjıları esabınan baspada járiyalaw, aralıqtan oqıtıwdı jetilistiriw maqsetinde jańa platforma islep shıǵıw, súwretlew ónerine qábiletli jaslardıń hám belgili xudojniklerdiń jumıslarınan ibarat galereyalar shólkemlestiriw, «Universiada» sport oyınları qatarına paralimpiya oyınların kirgiziw, studentlerdiń sırt ellerdegi hám respublikamızdaǵı joqarı oqıw orınlarına akademiyalıq mobillik tiykarında almasıwların jolǵa qoyıw, respublikamızdaǵı barlıq joqarı oqıw orınları hám ilimiy oraylardıń ilimiy jurnallarında qaraqalpaq tilinde de maqalalardı járiyalaw imkaniyatın jaratıp beriw, sonday-aq, jaslar ózleriniń startap hám innovaciyalıq joybarların ministrlik tárepinen qollap-quwatlanıwı boyınsha usınıslar bildirildi.

Ministr Ibrohim Abdurahmonov bildirilgen usınıslar hám kóterilgen máselelerdi birme-bir tıńlap, olardıń unamlı sheshiliwi hám qollap-quwatlanatuǵınlıǵın ayrıqsha atap ótti hám juwapkerlerge tiyisli tapsırmalar berdi.

Ushırasıw óz ara pikir almasıw hám ashıq sáwbetlesiw tárizinde dawam etti.

Ushırasıwǵa Joqarı bilimlendiriw, ilim hám innovaciyalar ministriniń orınbasarı S.Buzrukxonov hám ministrliktiń Qaraqalpaqstan Respublikası aymaqlıq basqarmasınıń baslıǵı N.Kayupov qatnastı.

NMPI baspasóz xızmeti.