Búgin, 4-aprel kúni Ájiniyaz atındaǵı Nókis mámleketlik pedagogikalıq institutında «El-yurt umidi» qorınıń 2023-jılǵı birinshi ashıq stipendiya tańlawı tártibi menen baylanıslı jańalıqlardı Qaraqalpaqstan Respublikasındaǵı mámleketlik xızmetkerler, joqarı oqıw orınlarınıń studentleri hám ilimiy izleniwshiler, sonday-aq, mektep pikteriwshilerine túsindiriw maqsetinde onlayn seminar bolıp ótti.

Seminarǵa mámleketlik uyımlar hám shólkemlerdiń xızmetkerleri, joqarı oqıw orınlarınıń studentleri, Prezident mektepleri, ulıwma bilim beriw mektepleriniń pitkeriwshi klass oqıwshıları qatnastı.

«El-yurt umidi» qorı atqarıwshı direktorınıń orınbasarı wazıypasın atqarıwshısı J.Axmedov tárepinen qordıń ashıq stipendiya tańlawların ótkeriw tártibi, ajıratılǵan kvotalar, baslı baǵdarlar, tańlawdı shólkemlestiriw mexanizmi jáne elektron hújjet tapsırıw platformasınıń islew tártibi menen baylanıslı barlıq máseleler boyınsha tolıq maǵlıwmatlar berildi.

Sonıń menen birge, onlayn seminarda «El-yurt umidi» qorınıń Qaraqalpaqstan Respublikasınan bolǵan sırt elde oqıp atırǵan stipendiatları da qatnasıp, qordıń tańlawları hám abıroylı sırt el universitetlerindegi oqıw imkaniyatları, processleri haqqında qatnasıwshılarǵa túsindirip berdi.

Ilaj qızǵın soraw-juwaplarǵa, pikirlesiwlerge bay boldı.

NMPI baspasóz xızmeti.