Búgin, 6-aprel kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Konstituciyasınıń qabıl etilgenine 30 jıl tolıwına arnalǵan saltanatlı ilaj bolıp ótti.

Ilajǵa Qaraqalpaqstan Respublikası Joqarǵı Keńesiniń komitet baslıǵı Z.Reymova, Qaraqalpaqstan Respublikası Hákimshilik sudınıń baslıǵı A.Nurlepesov, Qaraqalpaqstan Respublikası Ishki isler ministriniń orınbasarı A.Ótemuratov, fakultet dekanaları, professor-oqıtıwshılar, student-jaslar hám ǴXQ wákilleri qatnastı.

Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri atqarılıwı menen baslandı.

Ilajdı institut rektorı B.Otemuratov basqarıp bardı.

Atap ótilgenindey, konstituciya – hár bir mámlekettiń tariyxı, búgingi kúni hám keleshegin, xalıqtıń erk-ıqrarın ózinde sáwlelendiriwshi tiykarǵı nızam bolıp esaplanadı.

Qaraqalpaqstan Respublikasınıń Konstituciyası 1993-jıl 9-aprel kúni on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen.

Qaraqalpaqstan Respublikasınıń Konstituciyası alǵı sóz, 6 bólim, 26 bap, 121 statyadan ibarat.

Konstituciya ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıq hám erkinlikleriniń isenimli qorǵalıwınıń kepili bolıp esaplanadı.

Bas Nızamımızda barlıq normalar eń aldı menen insannıń huqıq hám máplerin kepillikke ala otırıp, insan-jámiyet-mámleket principi tiykarında islep shıǵılǵan.

Konferenciyada Qaraqalpaqstan Respublikası Joqarǵı Keńesiniń komitet baslıǵı Z.Reymova Bas Nızamımızda belgilengen normalardıń turmısımızda tutqan ornı, sońǵı jıllarda elimizde bilimlendiriw tarawı, sonıń ishinde, jaslardıń joqarı maǵlıwmatlı bolıwı ushın jaratılıp atırǵan sharayatlar hám imkaniyatlar haqqında maǵlıwmatlar berdi.

Ilajda instituttıń milliy ideya, ruwxıylıq tiykarları hám huqıq tálimi kafedrasınıń baslıǵı E.Tilewov, usı kafedra docenti T.Qudaybergenovalar Konstituciyada insan huqıq hám erkinlikleriniń kepillikleri, olar tiykarında islep shıǵılıp atırǵan normativlik-huqıqıy hújjetler haqqında bayanatlar jasadı.

Shıǵıp sóylewshiler jıynalǵanlardı Qaraqalpaqstan Respublikası Konstituciyasınıń qabıl etilgenine 30 jıl tolıwı bayramı menen qutlıqlap, mámleketimizde nızam ústinligin támiyinlew, jaslardıń huqıqıy sawatlılıǵı jáne mádeniyatın arttırıw baǵdarında ámelge asırılıp atırǵan jumıslar haqqında aytıp ótti.

NMPI baspasóz xızmeti.