Búgin, 6-aprel kúni Qaraqalpaqstan Respublikası Joqarǵı Keńesiniń komitet baslıǵı Zuxra Reymova bir qatar juwapker wákiller menen birge Ájiniyaz atındaǵı Nókis mámleketlik pedagogikalıq institutında bolıp, studentlerdiń oqıwı, bos waqıtların mazmunlı ótkeriwi ushın jaratılǵan sharayatlar menen tanıstı.

Dáslep elimiz boylap dawam etip atırǵan «Jasıl mákan» ulıwma milliy akciyası sheńberinde jaqsı niyetler menen institut átirapına dekorativ terek nálleri otırǵızıldı.

Sońınan usı oqıw jılı basında paydalanıwǵa tapsırılǵan 4-sanlı oqıw imaratınıń sport zalı, 1-sanlı studentler turaq jayındaǵı sharayatlardı kózden ótkerdi.

Studentler jataqxanasında Prezidentimiz tárepinen alǵa súrilgen «Bes baslama» tiykarında jumıs alıp barıp atırǵan dógereklerdiń jumısları menen tanısıp, studentler menen sáwbetlesti.

Sonday-aq, institut rektorı B.Otemuratov institutta alternativalıq energiya dáreklerinen paydalanıw boyınsha alıp kelip ornatılǵan quyash panelleri hám suw ısıtıw qurılmaları haqqında maǵlıwmatlar berdi.

Miymanlar institut qasınan qurılıp atırǵan 90 orınǵa mólsherlengen mektepke shekemgi bilimlendiriw shólkeminiń qurılıs jumısları menen de tanısıp, institutta jaslar ushın jaratılıp atırǵan sharayatlarǵa joqarı baha berdi.

NMPI baspasóz xızmeti.