Mámleketimizde ámelge asırılıp atırǵan keń kólemli reformalardıń nátiyjesinde barlıq tarawlar qatarında diniy-aǵartıwshılıq turmısımızda da úlken ózgerisler júz bermekte. Muqaddes dinimizdiń tınıshlıq, doslıq, keńpeyillik hám adamgershilik sıyaqlı ideyaların, islam civilizaciyasınıń rawajlanıwına úlken úles qosqan ullı ata-babalarımızdıń bay ilimiy miyrasların úyreniw hám úgit-násiyatlaw, jaslardı usınday ruwxta salamat hám nawqıran etip tárbiyalaw, jawızlıqqa qarsı aǵartıwshılıq penen gúresiw baǵdarında keń imkaniyatlar jaratılmaqta.

Ásirese, elimizdiń mómin-musılmanları xalqımız ushın ásirler dawamında jaqsılıq, miyrim-shápáát, qayır-saqawat belgisi bolıp kelgen muqaddes Ramazan ayın úlken quwanısh hám shúkirshilik penen ótkerip, iygilikli ámellerin atqarmaqta.

Usınday sharapatlı kúnlerde xalqımızdıń duwa-pátiyasın alıw, ómirlik tájiriybesi mol jasıúlkenler menen bir dasturxan átirapında otırıp gúrrińlesiw, keńeslerin alıw maqsetinde Ájiniyaz atındaǵı Nókis mámleketlik pedagogikalıq institutı rektoratı hám kásiplik awqamı komiteti tárepinen iftarlıq dasturxanı jayıldı.

Institut átirapındaǵı «Qumbız awıl», «Kók ózek» hám «Jas áwlad» mákan puqaralar jıyınlarınıń jasıúlken nuranıyları, sonday-aq, instituttıń nuranıy professor-oqıtıwshıları iftarlıq dasturxanına mirát etildi.

Ilaj barısında nuranıylar institut jámáátiniń kórsetip atırǵan itibarı hám ǵamqorlıǵı ushın minnetdarshılıq bildirip, qolların pátiyaǵa jayıp, elimizge tınıshlıq, xalqımızǵa abadanlıq, qut-bereket, mol ırısqı-nesiybe, jas áwlad tárbiyasında ayanbay miynet etip atırǵan pedagog-xızmetkerlerdiń jumıslarında tabıslar tiledi.

NMPI baspasóz xızmeti.