Usı jıldıń 26-aprel kúni Ájiniyaz atındaǵı Nókis mámleketlik pedagogikalıq institutı Mektepke shekemgi tárbiya hám defektologiya kafedrası tárepinen «Arnawlı pedagogika: mashqala hám sheshimler» atamasında xalıqaralıq ilimiy-teoriyalıq konferenciya shólkemlestirildi.

Konferenciyaǵa Rossiya Federaciyası Qazan (Volga wálayatı) federal universiteti, Qazaqstan Respublikası Abay atındaǵı Qazaq milliy pedagogika universiteti, Psixologiya ilimleri boyınsha xalıqaralıq Akademiyası doktorları, Qaraqalpaqstan Respublikası Mektepke shekemgi bilimlendiriw ministriliginen qánigeler, Samarqand, Ferǵana, Qoqand, Jizzaq qalalarındaǵı joqarı oqıw orınları professor-oqıtıwshıları, Nizomiy atındaǵı Tashkent mámleketlik pedagogikalıq universiteti, Berdaq atındaǵı Qaraqalpaq mámleketlik universiteti ilimpazları mazmunlı bayanatları menen qatnastı.

Ilimge qızıǵıwshı jas izleniwshiler, magistranlar hám studentler ózlerin qızıqtırǵan sorawlarına juwaplar aldı.

Konferenciya juwmaǵında arnawlı pedagogika tarawında ilimiy-pedagogikalıq jumıslardı rawajlandırıw, inklyuziv bilimlendiriwdi sapalı shólkemlestiriw boyıncha bir qatar usınıslar islep shıǵıldı hám konferenciya qatnasıwchılarına sertifikatlar tapsırıldı.