Ájiniyaz atındaǵı Nókis mámleketlik pedagogikalıq institutında XX ásir túrkmen ádebiyatınıń tiykarın salıwshılardıń biri, jazıwshı hám shayır Ata Govshudovtıń tuwılǵanına 120 jıl tolıwına arnalǵan «Ata Govshudov – ullı sóz zergeri» atamasındaǵı ádebiy keshe bolıp ótti.

Kesheni instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Ádebiy keshe eki bólimnen ibarat bolıp, dáslepki bólimde bayanatshılar – filologiya ilimleriniń doktorı, docent Turǵanbay Kerwenov, sonday-aq, filologiya ilimleri boyınsha filosofiya doktorı, docent Sayat Jepbarovalar sóz zergeriniń ómiri hám dóretiwshiligi haqqında maǵlıwmatlar berdi.

Ata Govshudov dáslepki bilimdi awıllıq mektepte alıp, 1922-jılı Moskvadaǵı Shıǵıstanıw universitetine oqıwǵa kirdi. Oqıw menen birge ol sol dáwirdegi jazıwshı hám shayırlardıń shıǵarmaları menen tanısıp bardı. Onıń dáslepki dóretpesi de sol jılı «Qızıl puldıń qulları» atamasındaǵı pesası dóretilgen.

Ol 1924-jılı Ashxabadta jumıs baslap, 1928-jıldan kórkem óner mektebiniń direktorı bolıp isledi. Sonıń menen birge, 1926-jılı shólkemlestirilgen dáslepki teatr-studiyada da jumıs alıp barıp, keyin ala usı teatr-studiya direktorı boldı hám túrkmen teatr óneriniń rawajlanıwına óziniń salmaqlı úleslerin qostı.

Túrkmen mámleketlik ilimiy-izertlew til hám ádebiyat institutında xalıq dóretiwshiligi sektorında birneshe jıllar boyı ilimiy xızmetker bolıp islep, túrkmen xalqınıń bay ádebiy miyrasın jıynaw, úyreniw hám baspadan shıǵarıwda úlken jumıslardı atqardı. Ol Palwan baqsıdan «Góroǵlı» eposınıń 12 bólimin jazıp alıp, oǵan jáne bir bólim qostı hám túrkmen folklorında usı epostı birinshiler qatarında baspadan shıǵardı.

Ádebiy keshede Qaraqalpaqstan Respublikası Túrkmen milliy-mádeniy orayı hám basqa da birqatar shólkemlerden miymanlar qatnasıp, túrkmen ádebiyatınıń qaraqalpaq, ózbek hám qazaq ádebiyatı menen tıǵız baylanısları haqqında pikirlerin bildirdi.

Kesheniń ekinshi bólimi studentlerdiń atqarıwındaǵı kórkem-ádebiy koncert baǵdarlaması menen dawam etti.

NMPI baspasóz xızmeti.