Xabarıńız bar, respublikamızdaǵı barlıq joqarı oqıw orınlarında «Teatr hápteligi» sheńberinde bir qatar mádeniy ilajlar shólkemlestirilmekte.

Búgin, 3-may kúni Ájiniyaz atındaǵı Nókis mámleketlik pedagogikalıq institutında háptelik sheńberinde fakultetler arasında studentler teatr-studiyaları tańlawına start berildi.

Tańlawdıń búgingi reglamentine muwapıq, Tariyx hám Fizika-matematika fakultetleriniń talantlı studentleri saxnada óz sheberliklerin, qábiletlerin kórsetiwge háreket etti.

«Tuwılmaǵan náresteler nalası» atamasındaǵı saxnalıq kórinisi arqalı jámiyettegi, adamlar arasındaǵı arzımaǵan sebeplerge baylanıslı júzege keletuǵın shańaraqlıq mashqalalar, olardıń perzent tárbiyasına, onıń keleshegine bolǵan unamsız aqıbetlerin kórsetip bergen Tariyx fakulteti studentleri tamashagóylerdiń kewillerinen orın alǵan bolsa, belgili dramaturg Keńesbay Raxmanovtıń «Ínjıqtıń muhabbatı» komediyasın sheberlik penen atqarıp shıqqan Fizika-matematika fakulteti studentleri jıynalǵanlarǵa kóterińki keypiyat ulastı.

Tańlaw belgilengen grafik tiykarında barlıq fakultetler kesiminde dawam etedi.

NMPI baspasóz xızmeti.