Ájiniyaz atındaǵı Nókis mámleketlik pedagogikalıq institutında Ózbekstan xalıq xudojnigi, Berdaq atındaǵı mámleketlik sıylıqtıń laureatı, Qaraqalpaqstan Respublikasına xızmet kórsetken kórkem óner ǵayratkeri, Ózbekstan Kórkem óner akademiyasınıń haqıyqıy aǵzası, akademik Jollıbay Izentaevtıń 80 jıllıǵına arnalǵan eslew keshesi bolıp ótti.

Ilaj xudojniktiń túrli tematika hám janrlarda dóretken kartinalarınıń kórgizbesi menen baslandı.

Keshege Qaraqalpaqstan xalıq xudojnigi Barlıqbay Aytmuratov, Qaraqalpaqstan xalıq jazıwshısı Alpısbay Sultanov, Ózbekstan Kórkem óner akademiyası Qaraqalpaqstan bóliminiń baslıǵı Ulbosın Utegenova, sonday-aq, xudojniktiń birge islesken kásiplesleri, shákirtleri hám perzentleri qatnastı.

Jollıbay Izentaev 1943-jılı Qońırat rayonında dúnyaǵa keldi. Ol 1974-jılı Ostrovskiy atındaǵı Tashkent mámleketlik teatr hám kórkem óner institutın pitkerip kelgennen soń Qaraqalpaqstan xudojnikleriniń awqamına aǵzalıqqa qabıl etildi. Solay etip, talantlı xudojniktiń dóretiwshilik ómiriniń tolıp tasqan dáwirleri baslandı.

Ol 1974-1979-jıllarda Nókis kórkem óner óndirislik ustaxanasında xudojnik, 1979-jıldan Qaraqalpaqstan xudojnikleri awqamı (házirgi Ózbekstan Kórkem óner akademiyası Qaraqalpaqstan bólimi) baslıǵı, 1992-1997-jılları Ájiniyaz atındaǵı Nókis mámleketlik pedagogikalıq institutı súwretlew óneri hám sızıw kafedrasınıń úlken oqıtıwshısı, kafedra baslıǵı, docent lawazımlarında jemisli miynet etti.

1996-jıldan baslap Franciya, Rossiya, Bolgariya, Germaniya, Sloveniya, Egipet sıyaqlı mámleketlerde dóretiwshilik xızmet saparlarında bolıp, usı ellerde xudojniklerdiń jeke kórgizbelerin shólkemlestirdi.

Qaraqalpaqstan Respublikasınıń mámleketlik bayraǵı hám gerbi de Jollıbay Izentaev qatnasıwındaǵı eskizler menen orınlanǵanın ayrıqsha atap ótiw orınlı.

Ol bárqulla ósip kiyatırǵan jas áwladtıń joqarı mádeniyatlı, bilimli bolıwın maqset etip, jas talant iyelerin qollap-quwatlaw, xoshametlewde ayrıqsha jumıslardı atqarıp júretuǵın edi. Usı maqsette ol 1992-jılı Ájiniyaz atındaǵı Nókis mámleketlik pedagogikalıq institutında súwretlew óneri hám sızıw kafedrasınıń, sonıń menen birge, 1997-jılı Ózbekstan Kórkem óner akademiyası Qaraqalpaqstan bólimine qaraslı qánigelestirilgen mektep-internatınıń ashılıwında ayrıqsha belsendilik kórsetti.

Eslew keshesinde sózge shıqqanlar xudojniktiń ómiri hám dóretiwshiligi haqqında qatnasıwshılarǵa keń túrde maǵlıwmatlar berdi.

NMPI baspasóz xızmeti.