Ájiniyaz atındaǵı Nókis mámleketlik pedagogikalıq institutında 15-may – Xalıqaralıq shańaraq kúnine arnalǵan seminar bolıp ótti.

Seminarǵa Ózbekstan Respublikası Ministrler Kabineti janındaǵı «Shańaraq» ilimiy-ámeliy izertlew orayı Qaraqalpaqstan Respublikası basqarmasınıń baslıǵı, psixologiya ilimleriniń doktorı, docent Marat Utepbergenov hám student-jaslar qatnastı.

Ilajda atap ótilgenindey, Birlesken Milletler Shólkemi Bas Assambleyasınıń 1993-jıl 15-may kúngi rezolyuciyası tiykarında usı kún dúnya júzilik shańaraq kúni dep belgilengen.

Ózbekstan Respublikası Prezidentiniń 2018-jıl 27-iyundaǵı «Ózbekstan Respublikasında shańaraq institutın bekkemlew koncepciyasın tastıyıqlaw haqqında»ǵı qararına muwapıq, elimizde 15-may – Xalıqaralıq shańaraq kúni sıpatında keń túrde belgilenedi.

Shańaraq – jámiyettiń baslı buwını, xalqımızdıń ata-babalardan miyras bolıp kiyatırǵan úrp-ádetleri hám qádiriyatların ózinde jámlegen muqaddes dárgay bolıp tabıladı. Hámmemizge belgili, iygilikli isler shańaraqtan baslanadı, onnan jámiyetke ótedi.

Shańaraq jámiyettiń tiykarǵı elementi sıpatında insanıy qádiriyatlar, mádeniyat hám áwladlardıń tariyxıy dawamlılıǵı, turaqlılıq jáne rawajlanıw faktorı bolıp xızmet etedi. Shańaraq sebepli mámleket bekkemlenedi hám xalıqtıń turmıs abadanlıǵı artadı.

Seminarda mámleketimizde jas shańaraqlardı qollap-quwatlaw, olarǵa imkaniyatlar jaratıp beriw baǵdarında ámelge asırılıp atırǵan keń kólemli jumıslar, shańaraqlardaǵı psixologiyalıq jaǵdaylar, orın alıp atırǵan mashqalalar hám olardıń sheshimleri boyınsha óz ara pikir almasıwlar, birgelikte dodalawlar, sonday-aq, diskussiyalar ótkerildi.

Seminar barısında studentler ózlerin qızıqtırǵan sorawlarǵa juwap aldı.

NMPI baspasóz xızmeti.