Ájiniyaz atındaǵı Nókis mámleketlik pedagogikalıq institutı Tábiyǵıy pánler fakulteti tárepinen «Tábiyǵıy pánlerdiń aktual máseleleri» atamasındaǵı IV xalıqaralıq ilimiy-teoriyalıq konferenciyası shólkemlestirildi.

Konferenciyanıń ashılıw plenar májilisinde Rossiya Federaciyasınıń Qazan federal universiteti psixologiya hám bilimlendiriw institutı docenti, biologiya ilimleriniń kandidatı Emil Minnibaev, Moskva mámleketlik pedagogikalıq universiteti professorı, biologiya ilimleriniń doktorı Mixail Markov, sonday-aq, respublikamızdaǵı jetekshi joqarı oqıw orınları, ilimiy-izertlew oraylarınıń alımları, fakultet professor-oqıtıwshıları, doktorant, magistrant hám studentler óz bayanatları menen shıǵıp sóyledi.

Konferenciyada atap ótilgenindey, sońǵı jılları Aralboyı regionında ekologiyalıq jaǵdaydı túp-tiykarınan jaqsılaw, aymaqtı sociallıq-ekonomikalıq jaqtan rawajlandırıwdı jedellestiriw hám xalıqtıń turmıs tárizi hám dáramatların arttırıwǵa baǵdarlanǵan keń kólemli reformalar ámelge asırıldı.

Aral teńiziniń qurıp qalǵan bóleginde ekosistemanı jaqsılaw, izertlewler hám innovaciyalardıń aldınǵı tájiriybelerin engiziw maqsetinde Ózbekstan Respublikası Prezidenti janındaǵı Aralboyı xalıqaralıq innovaciyalıq orayı hám Birlesken Milletler Shólkeminiń Aralboyı regionı ushın Insan qáwipsizligi boyınsha kóp tárepleme sheriklik trast fondı shólkemlestirildi. Aral boyı regionın ekologiyalıq innovaciyalar hám texnologiyalar aymaǵı dep járiyalaw haqqında Birlesken Milletler Shólkemi Bas Assambleyasınıń arnawlı rezolyuciyası qabıl etildi.

Álbette, ámelge asırılıp atırǵan bunday jumıslar menen bire búgingi ekologiyalıq jaǵdaydı jaqsılaw baǵdarında isleniwi kerek bolǵan jumıslar oǵada kóp. Konferenciyada bayanatshılar tárepinen usı máseleler dógereginde ilimiy pikirler, juwmaqlar bildirildi.

Konferenciya sekciyalarda óz jumısın dawam etti.

NMPI baspasóz xızmeti.