Ájiniyaz atındaǵı Nókis mámleketlik pedagogikalıq institutı Málimleme-resurs orayı Sırt el málimleme-kitapxana resursları menen islew bólimi hám 48-sanlı ulıwma bilim beriw mektebi menen birgelikte «Kitaplar dúnyasına sayaxat» atamasındaǵı sáwbetlesiw keshesi ótkerildi.

Keshege instituttıń qaraqalpaq tili kafedrasınıń docenti, filologiya ilimleriniń kandidatı M.Embergenova, MRO sırt el málimleme-kitapxana resursları menen islew bólimi xızmetkerleri, mektep muǵallimleri hám oqıwshıları qatnastı.

Kesheni MRO sırt el málimleme-kitapxana resursları menen islew bólimi bibliografı Z.Auezova alıp barıp, ulıwma bilim beriw mektepleri oqıwshı-jaslarınıń dúnyaqarasın keńeytiw, kitap oqıw mádeniyatın arttırıw hám kásipke baǵdarlaw maqsetinde institut málimleme-resurs orayı fondındaǵı ádebiyatlardan nátiyjeli paydalanıw hám metodikalıq járdem kórsetiwdi shólkemlestiriw boyınsha alıp barılıp atırǵan jumıslar haqqında aytıp ótti.

Sońınan sırt el málimleme-kitapxana resursları menen islew bólimi baslıǵı R.Amanbaeva mektep oqıwshıları menen olardıń oqıǵan ádebiy kitapları haqqında sóylesip, pikir alıstı. Bunnan keyin qaraqalpaq tili kafedrasınıń docenti, filologiya ilimleriniń kandidatı M.Embergenova shıǵıp soylep, kitap oqıwdıń áhmiyeti, kitap oqıw arqalı insannıń sana seziminiń, pikirlew dárejesiniń, sóylew mádeniyatınıń  rawajlanıwın aytıp ótti.

Bunnan keyin mektep muǵallimleri M.Alieva, S.Bayjanovalar usınday ushırasıwlardıń mektep oqıwshıları ushın áhmiyetin atap ótip, ele de kóbirek shólkemlestiriwdi usınıs etti.

Keshe oqıwshılar tárepinen berilgen soraw-juwaplar menen qızıqlı ótti.