Aldın xabar bergenimizdey, usı jıldıń 21-24-may kúnleri aralıǵında Tashkent qalasında joqarı oqıw orınları studentleri arasında regbi-7 boyınsha «Universiada-2023» sport jarıslarınıń respublikalıq final basqıshı bolıp ótti.

«Universiada» sport oyınları qatarında birinshi márte ótkerilgen jarısqa qızıǵıwshılıq hám tayarlıqlar oǵada qızǵın boldı.

Jarısta Ájiniyaz atındaǵı Nókis mámleketlik pedagogikalıq institutı hám Berdaq atındaǵı Qaraqalpaq mámleketlik universiteti studentlerinen ibarat Qaraqalpaqstan Respublikası saylandı komandası múnásip qatnasıp, Samarqand, Nawayı wálayatları hám Tashkent qalası komandaların jeńip shıqtı. Ferǵana wálayatı komandası menen bolıp ótken yarım final oyınında komandamızǵa biraz áwmet jetispegen bolsa, 3-orın ushın ótkerilgen jarısta jerleslerimiz Namangan wálayatı komandasına hesh qanday imkaniyat qaldırmadı.

Solay etip, saylandı komandamız aǵzaları regbi-7 boyınsha «Universiada-2023» sport jarıslarınıń respublikalıq final basqıshında qola medallarına iyelik etti.

Komandanı jarısqa trener Jetkerbay Bazarov hám NMPI sport klubı baslıǵınıń orınbasarı Atabay Erejepovlar tayarladı.

Sportshılarımızdı qolǵa kirgizgen tabısları menen qutlıqlaymız!

NMPI baspasóz xızmeti.