Amerika Qurama Shtatlarınıń Ózbekstandaǵı Ayrıqsha hám tolıq huqıqlı elshisi Djonatan Xenik Ájiniyaz atındaǵı Nókis mámleketlik pedagogikalıq institutına keldi.

Elshi mırza dáslep institut rektorı Bayrambay Otemuratov penen ushırasıw ótkerdi.

– Elshixanamız hám siziń institutıńız arasındaǵı birge islesiw jumısların joqarı dárejede dep esaplayman, – dedi elshi Djonatan Xenik.

Ushırasıwda institutta AQSh elshixanası menen birgelikte 2016-jıldan berli óz jumısın dawam ettirip atırǵan «Access Microscholarship» baǵdarlaması sheńberinde ámelge asırılıp atırǵan jumıslar, sonıń menen birge, AQShtaǵı joqarı oqıw orınları, ilimiy-izertlew orayları menen professor-oqıtıwshılar, studentler almasıw, ilimiy-pedagogikalıq baǵdarda birge islesiwdi bunnan bılay da rawajlandırıw máseleleri dodalandı.

Maǵlıwmat ornında atap ótiw orınlı, Nókis mámleketlik pedagogikalıq institutında 7 jıldan berli jumıs alıp barıp atırǵan «Access Microscholarship» baǵdarlaması sheńberinde professor-oqıtıwshılar dúnyadaǵı eń abıroylı joqarı oqıw orınlarınıń biri esaplanǵan Ostindegi Texas universitetinde qánigeligin jetilistiriw kurslarında oqıp qayttı.

Sáwbetlesiw barısında «Access Microscholarship», sonday-aq, «Fulbright» baǵdarlamaları boyınsha aldaǵı birgelikte ámelge asırılatuǵın jumıslar belgilep alındı.

Bunnan soń AQSh elshisi institutta «Access» baǵdarlaması sheńberinde 2022-2024-jıllarǵa mólsherlengen «English Access Microscholarship Program – STEM» grantı tiykarında ulıwma bilim beriw mektepleriniń 8-9-klass oqıwshıları ushın inglis tilin úyretiw boyınsha ámelge asırılıp atırǵan jumıslar menen tanıstı hám oqıwshılar menen sáwbetlesiw ótkerdi.

NMPI baspasóz xızmeti.