Ájiniyaz atındaǵı Nókis mámleketlik pedagogikalıq institutında student-jaslar qatnasıwında elimiz ardaǵındaǵı nuranıylar, belgili ilimpazlar hám basqa da taraw wákilleriniń aldınǵıları menen ushırasıw shólkemlestirildi.

Ushırasıwda Berdaq atındaǵı Qaraqalpaq mámleketlik universiteti professorı Q.Ismayılov, Ádillik ministrligi bólim baslıǵı Á.Ótewliev hám basqa da qánigeler sońǵı jıllarda mámleketimizde jaslar siyasatına qaratılıp atırǵan itibar hám ǵamqorlıqlar, ásirese, olardıń oqıwı, bilim alıwı, kásip-óner úyreniwi, qábiletlerin júzege shıǵarıwı, ilimiy-izertlewler hám isbilermenlik penen shuǵıllanıwı ushın jaratılıp atırǵan imkaniyatlar haqqında keń túrde maǵlıwmatlar berdi.

Sonday-aq, jaslar arasında usınday sharayatlardan durıs paydalanbastan, nadurıs túsinikke iye bolıp, qáte jollardan júrip atırǵanlar da ushıraspaqta.

Ilajda miymanlar barlıq jaslardı usınday jaǵdaylarda awızbirshilikli bolıp, biyparıq bolmastan, bir-birine itibarlı hám ǵamqor bolıwǵa shaqırdı.

Ásirese, máhállelerdegi jaslar arasında úgit-násiyat hám túsindiriw jumısların alıp barıw áhmiyetli ekenligi atap ótildi.

NMPI baspasóz xızmeti.