Búgin, 24-iyul kúninen baslap Ájiniyaz atındaǵı Nókis mámleketlik pedagogikalıq institutında 2023-2024-oqıw jılı ushın qabıllaw procesinde bakalavriattıń ayrıqsha qábilet talap etiletuǵın tálim baǵdarlarında kásiplik (dóretiwshilik) imtixanlar baslandı.

Dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ótkerilip atırǵan imtixanlardıń belgilengen talaplar tiykarında ádil hám ashıq-aydın ótiwi jámiyetlik shólkemler, siyasiy partiyalar, ǵalaba xabar quralları, sonıń menen birge, Joqarı bilimlendiriw, ilim hám innovaciyalar ministrliginen biriktirilgen wákiller tárepinen qadaǵalanbaqta.

Imtixanlar Internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Abiturientlerdiń bilim hám kónlikpelerin bahalaw ushın Ózbekstannıń túrli oqıw orınlarınan, atap aytqanda, Buxara, Namangan hám Qarshı mámleketlik universitetleri, Shaxrisabz, Qoqand mámleketlik hám Ózbekstan-Finlyandiya pedagogikalıq institutlarınan tájiriybeli professor-oqıtıwshılar jáne qánigeler biriktirilgen bolıp, olar tárepinen hár bir abiturienttiń tayarlıǵı ádil túrde bahalanıp, toplaǵan balları sol waqıttıń ózinde málim etilmekte.

— Búgin qızım instituttıń muzıkalıq tálim baǵdarına dóretiwshilik imtixan tapsırıp atır. Onıń kishkeneliginen usı tarawǵa bolǵan qızıǵıwshılıǵın kórip, qollap-quwatlawǵa háreket ettik. Qızım muzıka sırların úyrenip, joqarı maǵlıwmatlı bolıp, maman kadr bolıwdı óz aldına maqset etken. Mine, búgin institutqa kelip, bul jerdegi jaratılǵan sharayatlardan kewlim toldı. Imtixan processleri qalay ótip atırǵanın ashıq-aydın tikkeley baqlap otırmız, — deydi Qońırat rayonınan kelgen Dilafruz Ayımbetova.

Biz imtixanǵa qatnasqan abiturientlerdiń pikirleri menen de qızıqsındıq.

— Dene mádeniyatı tálim baǵdarına hújjet tapsırdım hám búgingi ótkerilgen imtixanda ózimniń fizikalıq hám ruwxıy tayarlıǵımdı kórsetiwge háreket ettim. Ótken jıllarda da joqarı oqıw ornına hújjet tapsırıp kire alǵan joq edim. Bıyıl ustazlarımız benen jaqsı tayarlıqlar kórip, imtixanda da jaqsı nátiyjelerge erisiwge háreket ettim. Imtixan ádil ótip atır dep esaplayman. Óytkeni, barlıq abiturientlerge óz nátiyjeleri sol waqıttıń ózinde, heshqanday irkinishsiz málim etilmekte, — deydi qaraózekli abiturient Jeńisbay Turǵanbaev.

Esletip ótemiz, institutta bakalavriattıń mektepke shekemgi hám baslawısh tálimde dene tárbiyası hám sport tálim baǵdarına kásiplik (dóretiwshilik) imtixanlar 29-iyuldan baslanıwı belgilengen.

Kásiplik (dóretiwshilik) imtixanlar 1-avgustqa shekem bir kúnde eki mezgilde dawam etedi.

NMPI baspasóz xızmeti.