14-sentyabr kúni Nókis qalasındaǵı oraylıq «Turan» stadionında «Jedel isbilermenlikti, innovaciyalıq ideyalar hám texnologiyalardı qollap-quwatlaw jılı» múnásibeti menen «Jasıl maydan malikaları» futbol jarısı ótkerildi. Ózbekstan jaslar awqamı Nókis qalalıq Keńesi, qalalıq hayal-qızlar shólkemi, Qaraqalpaqstan Respublikası futbol federaciyası hám qalalıq dene tárbiya hám sport bóliminiń shólkemlestiriwinde ótkerilgen jarısqa paytaxtımızdaǵı barlıq orta arnawlı hám joqarı oqıw orınlarında oqıp atırǵan 16-30 jas aralıǵındaǵı sportshı qızlar qatnastı. Jarıs dawamında Nókis pedagogikalıq kolledji qızların 5:0 esabında, Qaraqalpaq mámleketlik universiteti qızlar komandasın 2:0 esabında jeńgen Ájiniyaz atındaǵı Nókis mámleketlik pedagogikalıq institutınıń qızlar komandası jarıs jeńimpazı dep tabıldı. Jeńimpazlarǵa chempionlıq kubogı hám estelik sawǵaları tapsırıldı. Sportshılardı jarısqa trener Ruslan Ibrayımov tayarladı.