Assalawma áleykum, áziz doslar, qádirli watanlaslar!

Eń aldı menen, búgingidey quwanıshlı demlerde pútkil respublikamız xalqın Watanımız Ǵárezsizliginiń 32 jıllıǵı menen shın júrekten qutlıqlaymız!

Ótken dáwirde janajan Ózbekstanımız hám Qaraqalpaqstanımız mashaqatlı, sonıń menen birge, maqtanıshlı ǵárezsizlik jolın basıp ótti.

Bıyıl elimizde Watanımız Ǵárezsizliginiń otız eki jıllıǵı «Jańa turmıs ushın, Jańa Ózbekstan ushın!» súreni tiykarında keń túrde belgilenbekte.

Erkin hám azat, abadan turmısımızdıń ótken jılları dawamında qolǵa kirgizilgen tabıslarımızdı esaplap kórsek, barlıq tarawlar qatarında joqarı bilimlendiriw salasında da úlken jańalanıwlar, ózgerisler ámelge asırılǵanınıń gúwası bolamız.

Sońǵı jıllarda tarawdaǵı reformalar nátiyjesinde respublikamızda jumıs alıp barıp atırǵan mámleketlik hám mámleketlik emes joqarı oqıw orınlarınıń sanı eki esege arttı. Bir ǵana Qaraqalpaqstan Respublikasında joqarı oqıw orınlarınıń sanı 12 ge jetip, olarǵa qabıllaw kórsetkishleri 3,5 esege kóbeytildi. Bunıń nátiyjesinde joqarı bilimlendiriwge qamtıw kórsetkishleri aldınǵı 19 procentten 46 procentke ósti.

Institutımızdıń jańadan qurılıp atırǵan 2 mıń orınlıq oqıw imaratı ushın mámleketlik byudjetten 75 milliard sum qarjı ajıratılıp, búgingi kúnde jańa oqıw jılına paydalanıwǵa tapsırıw ushın jumıslar jedel túrde alıp barılmaqta.

Álbette, bulardıń barlıǵı mámleketimizde bilimlendiriw tarawına qaratılıp atırǵan dıqqat-itibardıń ámeliy nátiyjeleri bolıp tabıladı.

Áziz hám qádirli watanlaslarımızdı Ózbekstan Respublikası Ǵárezsizliginiń 32 jıllıq bayramı menen jáne bir márte qutlıqlay otırıp, barlıq iygilikli tileklerińizdiń ámelge asıwın, elimiz tınısh, aspanımız ashıq, suwımız mol, xalqımız abadan bolıwın tileymiz!

Jańa Ózbekstannıń, Jańa Qaraqalpaqstannıń keleshegi bolǵan jaslarımızǵa oqıw hám jumıslarında bárqulla úlken tabıslarǵa erisip júriwine tileklespiz!

Sheksiz húrmet penen,
Ájiniyaz atındaǵı Nókis mámleketlik pedagogikalıq institutı rektoratı.