Ájiniyaz atındaǵı Nókis mámleketlik pedagogikalıq institutı Mektepke shekemgi tálim fakulteti arnawlı pedagogika: logopediya tálim baǵdarınıń ziyrek studentleri inklyuziv bilimlendiriw hám imkaniyatı sheklengen jaslardı jámiyetke qosıw boyınsha innovaciyalıq joybarları menen YuNISEF tárepinen shólkemlestirilgen «ImkonLab» sociallıq isbilermenlik laboratoriyasında hár jılı turaqlı qatnasıp kelmekte.

Atap aytqanda, B.Nuratdinova «Qońırat rayonında kózi ázzi balalardı bilimlendiriwge tartıw», Z.Boranbaeva «Qońırat rayonında mayıplıǵı bolǵan hayal-qızlardıń psixikalıq túskinlikke túsiwi hám olardı kásipke tayarlaw arqalı jámiyetke tartıw» joybarları menen qatnasıp, grant jeńimpazı boldı.

Sonday-aq, arnawlı pedagogika: logopediya tálim baǵdarınıń ziyrek studentlerinen quralǵan «Nur» komandası bıyılǵı tańlawda «Qaraózek rayonında jasaytuǵın sóylewinde kemshiligi bolǵan balalarǵa reabilitaciyalıq hám korrekciyalıq járdem kórsetiw arqalı sabaqlardı jaqsı ózlestiriwine járdem beriw» joybarı menen qatnasıp, grant jeńimpazı boldı hám jazǵı demalıs dáwirinde ámeliy jumıslardı alıp bardı.

Olar sóylewinde kemshiligi bolǵan balalar mashqalaların sheshiwde zamanagóy, innovaciyalıq usıllar esaplanǵan «Teyp terapiya» hám «Art terapiya»lardan nátiyjeli paydalanbaqta.