Paytaxtımız Nókis qalasındaǵı Qaraqalpaqstan kórkem óner sarayında Ózbekstan Respublikası Prezidentiniń pármanı menen respublikamızdıń joqarı oqıw orınlarına qaraqalpaqstanlı jaslar ushın ajıratılǵan mámleketlik grant tiykarında 3 000, tólemli kontrakt tiykarında 6 500 orınlıq kvota tiykarında studentlikke qabıl etilgen student-jaslar hám olardıń ata-anaları ushın koncert shólkemlestirildi.

Qaraqalpaqstan Respublikası Joqarǵı Keńesi hám Ministrler Keńesi, Joqarı bilimlendiriw, ilim hám innovaciyalar ministrliginiń Qaraqalpaqstan Respublikası aymaqlıq basqarması, sonday-aq, respublikamızdaǵı joqarı oqıw orınları tárepinen shólkemlestirilgen koncert baǵdarlamasınan milliy, klassikalıq, estrada janrlarındaǵı qosıqlar, ayaq-oyınlar, kewilashar saxnalıq kórinisler orın aldı.

Ilaj sheńberinde joqarı oqıw orınları studentleriniń oqıw, ilim, mádeniyat, sport, kórkem óner tarawlarında, sonday-aq, hár qıylı respublikalıq hám xalıqaralıq tańlawlar, pán olimpiadalarında qolǵa kirgizgen jetiskenlikleri haqqında sóz etetuǵın kórgizbeler shólkemlestirildi.

Ata-analar hám studentler respublikamızǵa belgili kórkem óner sheberleri jáne joqarı oqıw orınlarınıń talantlı studentleri atqarıwındaǵı koncert baǵdarlamasında mádeniy dem alıp, yoshlı qosıqlarǵa ayaq-oyınǵa tústi.

Koncert baǵdarlaması qatnasıwshılarǵa bir dúnya quwanısh hám ilham-yosh baǵıshladı.

NMPI baspasóz xızmeti.
Fotosúwretler avtorı: Islam Matekov.