Berdaq atındaǵı Qaraqalpaq mámleketlik universitetiniń Mádeniyat sarayında «InnoWeek.uz-2023» xalıqaralıq innovaciyalıq ideyalar hápteligi sheńberinde Ájiniyaz atındaǵı Nókis mámleketlik pedagogikalıq institutı janındaǵı ilimiy dárejeler beriwshi DSc.03/30.12.2019.Ped.34.01-sanlı ilimiy keńeste 2018-2023-jıllarda ózleriniń ilimiy-izertlew jumısların nátiyjeli qorǵaǵan hám ilimiy jańalıqların bilimlendiriw tarawına en jaydırǵan jas ilimpazlardıń «Dissertaciyalıq izertlewlerdiń innovaciyalıq nátiyjeliligi» atamasındaǵı kórgizbesi shólkemlestirildi.

Kórgizbede Qaraqalpaqstan Respublikası Ministrler Keńesi Baslıǵınıń orınbasarı, ilimiy dárejeler beriwshi DSc.03/30.12.2019.Ped.34.01-sanlı ilimiy keńestiń baslıǵı, fizika-matematika ilimleriniń doktorı, professor B.Otemuratov jas ilimpazlar tárepinen jaratılǵan ilimiy innovaciyalıq islenbeler, elektron esaplaw mashinaları ushın programmalar, simulyaciyalıq programmalastırılǵan qurallar hám jaratılǵan veb-sayt materialları menen tanısıp, olardı bunnan bılay da jetilistiriw haqqında óz usınısların berdi.

Sonday-aq, kórgizbede p.i.d., professor w.a. M.Pazılova, p.i.d., docent Z.Kurbaniyazova, p.i.d., docent G.Abılova, docentler I.Allambergenov, B.Tlegenov, N.Orınbetov, S.Tajbenova, G.Aldjanova, A.Kadrekova, R.Xojanazarova, pedagogika ilimleri boyınsha filosofiya doktorları A.Turekeeva, A.Narshabaeva sıyaqlı ilimpazlar tárepinen jaratılǵan oqıw qollanba, sabaqlıq hám elektron qosımshalar, qaraqalpaq xalqınıń milliy qádiriyatların ózinde sáwlelendirgen ilimiy jumıslardıń nátiyjeleriniń de kórgizbeleri kópshiliktiń itibarın ózine tarttı.

Kórgizbede A.Bijanov, A.Jumamuratov, A.Qunnazarovlar sıyaqlı jas izleniwshilerdiń ilimiy izleniwlerden alınǵan nátiyjelerdi bilimlendiriw procesine en jaydırıwǵa qaratılǵan innovaciyalıq islenbeleri bilimlendiriw sistemasına sanlı texnologiyalardı en jaydırıwǵa xızmet etedi.

Ilim menen shuǵıllanıp atırǵan tayanısh doktorantlar hám erkin izleniwshiler Nókis mámleketlik pedagogikalıq institutı Ziyrek studentlerdiń ilimiy jumısların shólkemlestiriw bólimi baslıǵı Q.Tashanov penen birgelikte ziyrek student hám magistrantlar menen ilim hám innovaciyalıq izertlewler boyınsha pikir almasıwlar shólkemlestirildi.