Aldın xabar bergenimizdey, usı jıldıń 25-27-oktyabr kúnleri aralıǵında paytaxtımız Nókis qalasında joqarı oqıw orınları studentleri arasında matematika páninen Muhammed ál-Xorezmiy atındaǵı II Xalıqaralıq olimpiadası ótkerilmekte.

Búgin, 26-oktyabr kúni Berdaq atındaǵı Qaraqalpaq mámleketlik universiteti sport sarayında xalıqaralıq pán olimpiadasınıń birinshi turı baslandı.

Ilajda Qaraqalpaqstan Respublikası Ministrler Keńesiniń Baslıǵı F.Ermanov, Joqarı bilimlendiriw, ilim hám innovaciyalar ministrliginiń wákilleri hám tóreshiler quramı aǵzaları sózge shıǵıp, barlıq qatnasıwshılardı qutlıqladı hám pán olimpiadasında áwmet tiledi.

Esletip ótemiz, xalıqaralıq pán olimpiadasına ulıwma 40 tan aslam joqarı oqıw orınlarınan 200 den aslam student-jaslar, sonıń ishinde, Ájiniyaz atındaǵı Nókis mámleketlik pedagogikalıq institutı Fizika-matematika fakulteti matematika hám informatika tálim baǵdarınıń 2-kurs studentleri – Kamron Ibadullaev, Ismetulla Nawrızbaev, Bahram Allakuatov, Maman Genjaliev te qatnaspaqta.

Xalıqaralıq pán olimpiadasınıń ekinshi turı 27-oktyabr kúni ótkeriledi.

NMPI baspasóz xızmeti.

©️Fotosúwretler avtorı: Islam Matekov.