Aldın xabar bergenimizdey, usı jıldıń 25-27-oktyabr kúnleri aralıǵında paytaxtımız Nókis qalasında joqarı oqıw orınları studentleri arasında matematika páninen Muhammed ál-Xorezmiy atındaǵı II Xalıqaralıq olimpiadası ótkerilmekte.

Búgin, 27-oktyabr kúni Berdaq atındaǵı Qaraqalpaq mámleketlik universiteti sport sarayında xalıqaralıq pán olimpiadası turlarınıń nátiyjelerine baǵıshlanǵan ilaj ótkerildi.

Ilajda Ózbekstan Qaharmanı, Ózbekstan Ilimler Akademiyası V.I.Romanovskiy atındaǵı Matematika institutınıń direktorı, akademik Shavkat Ayupov, Oliy Majlis Nızamshılıq palatasınıń deputatı Muxtar Ibragimovlar sózge shıǵıp, xalıqaralıq olimpiada qatnasıwshıların qutlıqlap, mámleketimizde jaslardıń bilim alıwı, ilim menen shuǵıllanıwı ushın jaratılıp atırǵan sharayatlar haqqında aytıp ótti.

Ótkerilgen eki tur nátiyjeleri járiyalanıp, qatnasıwshılardıń apellyaciyalıq shaǵımları kórip shıǵıldı.

Esletip ótemiz, xalıqaralıq pán olimpiadasına ulıwma 40 tan aslam joqarı oqıw orınlarınan 200 den aslam student-jaslar, sonıń ishinde, Ájiniyaz atındaǵı Nókis mámleketlik pedagogikalıq institutı Fizika-matematika fakulteti matematika hám informatika tálim baǵdarınıń 2-kurs studentleri – Kamron Ibadullaev, Ismetulla Nawrızbaev, Bahram Allakuatov, Maman Genjaliev te qatnaspaqta.

Xalıqaralıq pán olimpiadasınıń juwmaǵı búgin Berdaq atındaǵı Qaraqalpaq mámleketlik akademiyalıq muzıkalı teatrında bolıp ótetuǵın saltanatlı máresimde járiyalanadı.

NMPI baspasóz xızmeti.
©️Fotosúwretler avtorı: Islam Matekov.