Ájiniyaz atındaǵı Nókis mámleketlik pedagogikalıq institutında 11-noyabr – Kásiplik awqamları kúnine arnalǵan bayram keshesi bolıp ótti.

Ilajda institut rektorı wazıypasın waqıtsha atqarıwshısı Q.Qodirov sózge shıǵıp, Ózbekstan Respublikasınıń 2020-jıl 23-noyabrdegi nızamı tiykarında bul bayram keń túrde belgilenip kiyatırǵanlıǵı, ótken dáwir ishinde kásiplik awqamı komiteti tárepinen pedagog-oqıtıwshılar, jumısshı-xızmetkerler, student-jaslardı qollap-quwatlaw, olardıń mashqalaların sheshiw baǵdarında kóplegen unamlı jumıslar ámelge asırılǵanın, ásirese, sońǵı jıllarda kásiplik awqamları jámiyetimizdiń áhmiyetli bólegine aylanǵanın ayrıqsha atap ótti.

Bayram keshesinde sáne múnásibeti menen institutta ótkerilgen sport jarısları, tańlawlar hám hár qıylı ilajlar, ilimiy-pedagogikalıq jumıslar, oqıw hám jámiyetlik jumıslarda belsene qatnasıp kiyatırǵan bir topar professor-oqıtıwshılar, juwapker xızmetkerler, sonday-aq, student-jaslarǵa kásiplik awqamı komiteti tárepinen sawǵalar tapsırıldı.

Ilaj instituttıń «Tumaris» xalıq ansambli aǵzaları hám talantlı studentler atqarıwındaǵı koncert baǵdarlaması menen dawam etti.

Maǵlıwmat ornında atap ótiw kerek, búgingi kúnde instituttıń kásiplik awqamı komiteti aǵzaları 19 mıńnan aslam adamdı qurap, komitet tárepinen tańlawlar, sport jarısları, dógerek sáwbetleri, ushırasıwlar, oqıw seminarları shólkemlestirilip, qarjılandırılıp barıladı.

Sonıń menen birge, jámáátlik shártnama tiykarında xızmetkerlerdiń jumıs sharayatların jaqsılaw, aylıq miynet haqısın óz waqtında beriw, miynetti qorǵaw hám texnikalıq qáwipsizlik ilajların jolǵa qoyıw, studentlerdiń oqıw sharayatların jaqsılaw hám stipendiyaların óz waqtında beriw baǵdarında da unamlı jumıslar ámelge asırılmaqta.

Pedagog hám texnikalıq xızmetkerler ushın qosımsha xoshametlew pulları hám materiallıq járdemler beriledi. Sonday-aq, ǵalabalıq-mádeniy, qayır-saqawat ilajları, bayram sáneleri, professor-oqıtıwshılar, xızmetkerler, studentlerdiń bos waqıtlarında elimizdiń tariyxıy qalaları boylap sayaxatlarǵa alıp shıǵıw, jumıs islewshiler hám olardıń perzentlerine dem alıw hám sawallandırıw oraylarına jollamalar beriw sıyaqlı ilajlarǵa qarjı ajıratıladı.

NMPI baspasóz xızmeti.