Ájiniyaz atındaǵı Nókis mámleketlik pedagogikalıq institutında belgili ádebiyattanıwshı pedagog-ilimpaz, Ózbekstan hám Qaraqalpaqstan Jazıwshıları awqamlarınıń aǵzası Mariya Bekbergenovanıń 70 jıllıǵına arnalǵan yubiley keshesi bolıp ótti.

Ilajǵa Qaraqalpaqstan Jazıwshıları awqamınıń baslıǵı, Ózbekstan xalıq jazıwshısı, Qaraqalpaqstan xalıq shayırı K.Kárimov, belgili jazıwshı B.Ernazarov, instituttıń Túrkiy tiller fakulteti jámááti, kásiplesleri, student-jaslar hám shákirtleri qatnastı.

Keshede Ózbekstan Ilimler Akademiyası Qaraqalpaqstan bólimi Qaraqalpaq gumanitar ilimler ilim-izertlew institutınıń úlken ilimiy xızmetkeri, filologiya ilimleriniń kandidatı, docent A.Otámbetova, instituttıń qaraqalpaq ádebiyatı kafedrasınıń doktorantı Q.Mámbetov ádebiyattanıwshı Mariya Bekbergenovanıń ómiri, ilimiy-pedagogikalıq xızmetleri, ádebiy dóretiwshiligi haqqında bayanat jasadı.

Mariya Bekbergenova 1953-jılı 3-dekabrde Moynaqta dúnyaǵa keldi. 1971-jılı orta mektepti pitkerip, Rostov wálayatındaǵı Taganrog mámleketlik pedagogikalıq institutı rus tili hám ádebiyatı fakultetine oqıwǵa kirdi.

Ol miynet jolın 1976-jılı Ózbekstan Ilimler Akademiyası Qaraqalpaqstan bóliminiń N.Dáwqaraev atındaǵı Til hám ádebiyat institutınıń ádebiyat bóliminde úlken laborantlıqtan basladı. Sońınan usı institutta ilimiy xızmetker, ilimiy xatker bolıp isledi. Keyin ala Ájiniyaz atındaǵı Nókis mámleketlik pedagogikalıq institutı Qaraqalpaq tili hám ádebiyatı fakultetinde dekan orınbasarı, al 2004-jıldan kafedra docenti wazıypasında jemisli miynet etpekte.

Onıń kóplegen ilimiy miynetleri respublikalıq hám xalıqaralıq basılımlarda jarıq kórdi.

Mariya Bekbergenova «Qaraqalpaq ádebiyatında dástúr, miyraslıq hám kórkem awdarmanıń ayırım áhmiyetli máseleleri» kitabı, sonday-aq, akademiyalıq liceylerdiń 3-kursı ushın «Qaraqalpaq ádebiyatı» sabaqlıǵınıń avtorı esaplanadı. 2005-jıldan Jazıwshılar awqamınıń aǵzası boldı.

Keshede ilimpazdıń kásiplesleri hám shákirtleri sózge shıqtı hám qutlıqlaw sózlerin aytıp, sawǵaların tapsırdı.

Ilaj talantlı studentler atqarıwındaǵı kórkem-ádebiy bólim menen dawam etti.

NMPI baspasóz xızmeti.