Ájiniyaz atındaǵı Nókis mámleketlik pedagogikalıq institutı Túrkiy tiller fakulteti qazaq tili hám ádebiyatı kafedrası tárepinen talantlı jaslardı xoshametlew, qazaq xalqınıń bay ruwxıy miyrası, ata-babalardan kiyatırǵan úrp-ádetleri hám dástúrlerin jaslar arasında keń túrde úgit-násiyatlaw maqsetinde «El ishi – óner kenishi» atamasındaǵı ádebiy saz-sáwbetli keshe shólkemlestirildi.

Ilajda Qaraqalpaqstan Respublikası Qazaq milliy mádeniy orayınıń baslıǵı Asqar Úmbetaev, qazaq tili hám ádebiyatı kafedrasınıń baslıǵı Írıstı Quttımuratovalar sózge shıǵıp, mámleketimizdi kóp milletli xalıqlardıń tatıw hám awızbirshilikte ómir súrip atırǵanı, solar qatarında qazaq xalqınıń milliy ózgesheliklerin keleshek áwladlarǵa jetkeriw, olardıń óz ana tilinde oqıp bilim alıwı ushın jaratılıp atırǵan imkaniyatlar haqqında atap ótti.

Keshe qazaq xalqınıń ruwxıy baylıqlarınıń biri esaplanǵan – aqınlar aytısı menen baslandı. Onda elimizde usı dástúrdi dawam etip, óz ónerleri menen belgili bolǵan aqınlar óz ara aytısqa túsip, jıynalǵanlardıń qollap-quwatlawına eristi.

Ádebiy keshe instituttıń qazaq tili hám ádebiyatı tálim baǵdarı menen birge muzıkalıq tálim, túrkmen tili hám ádebiyatı tálim baǵdarlarınıń studentleri jáne «Tumaris» xalıq ansambli aǵzalarınıń atqarıwındaǵı milliy qosıqlar, ayaq-oyınlar, poeziyalıq shıǵarmalardı kórkemlep oqıw, saxnalıq kórinisler menen dawam etti.

Ilaj sońında belsendilik kórsetken bir topar student-jaslar xoshametlendi.

NMPI baspasóz xızmeti.