Qaraqalpaqstan Respublikası sudı tárepinen xalqımız, ásirese, jaslar arasında hár qıylı jınayatshılıq hám huqıqbuzarlıqlardıń aldın alıw, mámleketimizde hár qanday nızambuzıwshılıq jaǵdaylarına nızamlı túrde shara qollanılatuǵınlıǵın kórsetiw hám bul arqalı jaslardıń huqıqıy mádeniyatın arttırıw maqsetinde xalqımız arasında, sonıń ishinde, joqarı oqıw orınlarında kóshpeli ashıq sud májilisleri turaqlı ótkerilmekte.

Usınday ilajlardıń biri Ájiniyaz atındaǵı Nókis mámleketlik pedagogikalıq institutında bolıp ótti.

Ilajda institut rektorı wazıypasın waqıtsha atqarıwshısı Q.Qodirov hám Jınayat isleri boyınsha Nókis qalalıq sudınıń baslıǵı Sh.Shamambetovlar sózge shıǵıp, búgingi kúnde jaslardıń huqıqıy bilim hám kónlikpelerin arttırıw, jámiyetimiz hám mámleketimizde nızam ústemligin támiyinlew baǵdarında ámelge asırılıp atırǵan jumıslardıń áhmiyeti haqqında toqtalıp ótti.

Kóshpeli ashıq sud májilisinde Ózbekstan Respublikası Jınayat kodeksiniń 169-statyası hám Hákimshilik juwapkershilik haqqındaǵı kodekstiń 183-statyası tiykarında ayıplanıp atırǵan puqaralardıń nızambuzıwshılıq jaǵdayları boyınsha jumıslar tiyisli tártipte kórip shıǵıldı.

Álbette, bunday ilajlardıń ótkeriliwi jaslardıń huqıqıy-demokratiyalıq mámleket qurıwday joqarı maqsetlerimiz baǵdarındaǵı bilimlerin arttırıp, olar arasında jınayatshılıq hám huqıqbuzarlıqlardıń aldın alıwǵa da xızmet etetuǵını sózsiz.

NMPI baspasóz xızmeti.