Ájiniyaz atındaǵı Nókis mámleketlik pedagogikalıq institutında student-jaslardıń Ózbekstan Respublikası Konstituciyası, onıń tiykarǵı principleri hám qaǵıydaları boyınsha bilimlerin arttırıwdı xoshametlew, ómirde óz ornın tabıwda bas nızamımızdıń áhmiyeti hám rolin túsiniwge múnásip sharayatlar jaratıw maqsetinde olimpiada shólkemlestirildi.

Olimpiadaǵa barlıq fakultetlerden komandalar qatnasıp, onda studentler «Konstituciya – meniń ómirimde» atamasında shıǵarma jazıw, jańa redakciyada qabıl etilgen Ózbekstan Respublikasınıń Konstituciyası boyınsha test sorawları, sonday-aq, soraw-juwap sıyaqlı shártler boyınsha bilimlerin sınaqtan ótkerdi.

Tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

1992-jılı 8-dekabr kúni ǵárezsiz Ózbekstannıń Konstituciyası qabıl etilgen bolsa, 2023-jıl 30-aprelde bolıp ótken ulıwma xalıqlıq referendum juwmaqları boyınsha jańadan ózgerisler hám qosımshalar kirgizilip, jańa redakciyada qabıl etildi.

Mámleketlik hám jámiyetlik strukturanıń tiykarǵı principleri hám qádiriyatların belgilep beretuǵın jańalanǵan Konstituciyanıń qabıl etiliwi Ózbekstannıń siyasiy hám huqıqıy turmısında áhmiyetli waqıya esaplanıp, mámlekettiń rawajlanıwına jańasha túrtki boldı.

Bul tariyxıy hújjet hákimiyat institutların jetilistiriw, puqaralardıń huqıqların qorǵaw hám basqarıwdıń demokratiyalıq principlerin rawajlandırıwǵa qaratılǵan háreketlerdi ózinde sáwlelendiredi, mámleketimiz aldına áhmiyetli wazıypalardı belgilep beredi.

Konstituciyada tiykarǵı itibar insan hám onıń huqıqları jáne erkinlikleri, yaǵnıy Ózbekstan Respublikasınıń hár bir puqarasına jeke huqıq hám erkinlikler, siyasiy hám sociallıq-ekonomikalıq huqıqlardıń kepilliklerin támiyinlewge qaratılǵan.

Elimizde nızam ústinligin támiyinlew arqalı puqaralıq jámiyetin qurıw, bunıń ushın xalqımızdıń huqıqıy mádeniyatın arttırıw, xalqımızdıń búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslardı ayrıqsha atap ótiw orınlı.

Ótkerilgen olimpiadada jaslardıń jańalanǵan Konstituciya boyınsha bilim hám kónlikpeleri sınaqtan ótkerildi.

Olimpiada juwmaǵında Tariyx fakultetiniń «Ádalat» komandası 1-orın, Pedagogika fakultetiniń «Pedagoglar» komandası 2-orın hám Shet tilleri fakultetiniń «Liderler» komandası 3-orındı iyeledi.

Jeńimpazlar hám sıylı orın iyeleri institutta ótkeriletuǵın Konstituciya bayramında diplom hám sawǵalar menen sıylıqlanadı.

NMPI baspasóz xızmeti.