Elimizde sociallıq járdemge mútáj, «Mehribanlıq úyi» tárbiyalanıwshıları bolǵan jaslardıń bilim alıwı, kásip-óner úyreniwi hám jámiyette óz ornına iye bolıp, mámleketimizdiń rawajlanıwına múnásip úleslerin qosıwı ushın barlıq sharayatlar jaratılǵan.

Prezidentimiz tárepinen jaslarǵa qaratılıp atırǵan itibar hám ǵamqorlıqlar nátiyjesinde Ájiniyaz atındaǵı Nókis mámleketlik pedagogikalıq institutı Tariyx fakultetiniń 1-kurs studenti Dilfuza Qayıpnazarovaǵa Qaraqalpaqstan Respublikası Joqarǵı Keńesi hám Ministrler Keńesiniń qollap-quwatlawı menen Nókis qalasınan turaq jay sawǵa etildi.

Institut rektorı wazıypasın waqıtsha atqarıwshısı Quvondiq Qodirov hám fakultet dekanatı wákilleri usı qayırlı baslamalardı dawam ettirip, jańa jıl qarsańında Dilfuzanıń halınan xabar alıp, oqıw procesinde paydalanıwı ushın noutbuk, sabaq tayarlaw ushın kerekli mebeller, asxana buyımları hám basqa da sawǵalardı tapsırdı.

Dasturqan átirapındaǵı shın júrekten sáwbetlesiw barısında bayram aldınan inám etilgen usınday sawǵalar ushın Dilfuza mámleketimiz basshılarına, institut rektoratı hám fakultet jámáátine minnetdarshılıǵın bildirdi.

– Bul men ushın úlken imkaniyat hám isenim dep esaplayman. Álbette, men bul isenimdi aqlap, keleshekte aldıma qoyǵan joqarı sheklerge qaray umtılıp, mámleketimizdiń rawajlanıwına óz úlesimdi qosıwǵa wáde beremen, – deydi ol.

NMPI baspasóz xızmeti.