Ájiniyaz atındaǵı Nókis mámleketlik pedagogikalıq institutında oqıp atırǵan student-jaslardıń bos waqıtların mazmunlı ótkeriw, joqarı mánawiyatlı, erkin pikirleytuǵın jaslardı tárbiyalaw, olardıń intellektual oylaw qábiletin jetilistiriw hám qollap-quwatlaw maqsetinde fakultetler arasında «Rektor kubogi» ushın «Zakovat» intellektual turniri shólkemlestirilmekte. 

Turnirde bakalavriattıń kúndizgi tálim baǵdarlarında, sonday-aq, magistratura qánigeliklerinde oqıp atırǵan student-jaslar qatnasıwı múmkin.

Komanda aǵzaları sanı 6 adamnan ibarat bolıp, fakultet dekanı (bólim baslıǵı) tárepinen tastıyıqlanadı hám turnir baslanıwınan 1 kún aldın instituttıń Jaslar menen islesiw, ruwxıylıq hám aǵartıwshılıq bólimine tapsırıladı.

Turnirde hár bir fakultetten 2 komandaǵa shekem qatnasıwı múmkin.

Turnir 2024-jıldıń fevral, mart, aprel hám may ayları dawamında ótkeriletuǵın ulıwma 9 turdan ibarat boladı. Hár bir tur eki hápteden bir márte, hápteniń shiyshembi kúni saat 12:00 de instituttıń úlken májilisler zalında ótkeriledi.

Turnirdiń final oyını 2024-jıl 29-may kúni saltanatlı tárizde ótkeriledi.

Sorawlar instituttıń «Ziyalı jaslar» intellektual klubı aǵzaları tárepinen dúziledi.

Hár bir oyında 20 sorawdan oynaladı. Hár bir sorawǵa juwaptı oylasıw ushın 1 minut, juwaptı jazıw ushın 10 sekund waqıt beriledi.

Waqıttan keshikken hám ózgertilgen juwaplar qabıl etilmeydi. Hár bir durıs juwap ushın 1 ball beriledi.

Apellyaciya oyınnan keyin boladı. Apellyaciya boyınsha tek ǵana komanda sárdarı múrájat etiwi múmkin boladı.

Turnirde eń joqarı ball toplaǵan 3 komanda sáykes túrde 1-, 2- hám 3-orınlardı iyelegen dep esaplanadı. Ballar teń bolıp qalǵan jaǵdayda qosımsha sorawlar oynaladı hám sol arqalı jeńimpazlar jáne sıylı orın iyeleri anıqlanadı.

Turnir juwmaǵında jeńimpaz (1-orındı iyelegen) komandanıń hár bir aǵzasına bazalıq stipendiya muǵdarınıń 2 esesi, 2- hám 3-orınlardı iyelegen komandalardıń hár bir aǵzasına bazalıq stipendiya muǵdarınıń 1 esesi muǵdarında qarjılay sıylıqlar beriledi.

Maǵlıwmat ornında atap ótiw kerek, «Rektor kubogi» turniriniń 1-tur oyını 2024-jıldıń 30-yanvar kúni saat 12:00 de instituttıń úlken májilisler zalında ótkeriledi. Qatnasıwdı qálewshi studentler fakultet dekanlarınıń jaslar máseleleri boyınsha orınbasarlarına múrájat etiwi kerek.

NMPI baspasóz xızmeti.