Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministri, polkovnik Baxtiyar Tórebekov qatnasıwında «Ministr hám jaslar» ushırasıwı bolıp ótti.

Ushırasıwǵa fakultet dekanları hám olardıń orınbasarları, professor-oqıtıwshılar, tyutorlar, jaslar awqamı baslanǵısh shólkemi hám studentler keńesiniń belsendi aǵzaları, sonday-aq, student-jaslar qatnastı.

Ilajda ministr mámleketimizde jaslar tálim-tárbiyası baǵdarında ámelge asırılıp atırǵan jumıslar haqqında maǵlıwmatlar berdi. Sonıń menen birge, orın alıp atırǵan kemshilikler haqqında ayta kelip, mashqalalardı saplastırıw baǵdarında isleniwi tiyis bolǵan wazıypalarǵa toqtaldı.

Jaslar arasında profilaktikalıq úgit-násiyat ilajları turaqlı ótkeriliwine qaramastan sońǵı jıllarda jınayatshılıq hám huqıqbuzarlıqlardıń jiyi ushırasıp turǵanı ashshı haqıyqat.

Atap aytqanda, ótken jıldıń ózinde joqarı oqıw orınlarınıń studentleri qatnasıwında 47 jınayat anıqlanǵan bolsa, sonnan 9 jınayat institut studentleri tárepinen ámelge asırılǵan. Sonday-aq, studentler qatnasıwındaǵı 148 huqıqbuzarlıqtıń 50 i usı oqıw dárgayı studentlerine tuwra kelgen.

Bunday unamsız kórsetkishler tarawda islenip atırǵan jumıslardı sın kózqarastan kórip shıǵıp, nátiyjeli mexanizmlerdi alǵa súriwdi talap etpekte.

Ushırasıwda ministr B.Tórebekov sońǵı jıllarda jaslar arasında Internet tarmaqlarındaǵı ekstremistlik mazmundaǵı buzǵınshı ideyalar tásirine túsip qalıw, oqıw procesinde korrupciyalıq jınayatlarǵa aralasıp qalıw, kiberjınayatlarǵa qol urıw sıyaqlı jaǵdaylardıń da artıp atırǵanın anıq mısallar menen atap ótip, jaslardı bunday illetlerden awlaq bolıwǵa shaqırdı.

Ilajda fakultet dekanları hám jaslar tárbiyasına juwapker qánigeler sózge shıǵıp, óz pikir-usınısların bildirdi.

Ushırasıw sońında jaslar tárbiyası, olar arasında jınayatshılıq hám huqıqbuzarlıqlar profilaktikası baǵdarında birgelikte ámelge asırılatuǵın jumıslar dodalanıp, juwapkerlerge tiyisli tapsırmalar berildi.

Ministr B.Tórebekov jaslardı watan súyiwshilik ruwxında tárbiyalaw, olardıń huqıqıy mádeniyatı hám sawatlılıǵın arttırıw boyınsha baslamalardı hámiyshe qollap-quwatlaytuǵınlıǵın jáne ámeliy járdem beretuǵınlıǵın ayrıqsha atap ótti.

Ilaj sheńberinde Qaraqalpaqstan Respublikası Ishki isler ministrliginiń tiyisli qánigeleri tárepinen kiberqáwipsizlik boyınsha túsindiriw jumısları alıp barıldı.

NMPI baspasóz xızmeti.