Ájiniyaz atındaǵı Nókis mámleketlik pedagogikalıq institutı sport zalında Qaraqalpaqstan Respublikasındaǵı joqarı oqıw orınları studentleri arasında «Studentler ligası» sport jarıslarınıń rásmiy ashılıw máresimi bolıp ótti.

Mámleketlik gimnler menen baslanǵan ilajda Qaraqalpaqstan Respublikası Sport ministrligi ǵalabalıq sport ilajların shólkemlestiriw hám ótkeriw bóliminiń baslıǵı Ikram Qudiyarov hám basqa juwapkerler sózge shıǵıp, jarıstı ótkeriwdiń maqseti haqqında maǵlıwmatlar berdi hám qatnasıwshılardı qutlıqladı.

Jarıslar tastıyıqlanǵan keste tiykarında 1-fevral kúninen baslap start alǵan bolıp, dáslepki kúnde joqarı oqıw orınlarınıń student-qızlarınan dúzilgen komandaları basketbol boyınsha óz ara kúsh sınastı. Qızlar arasında Berdaq atındaǵı Qaraqalpaq mámleketlik universiteti komandası 1-orındı iyelep, kelesi basqıshqa jollamanı qolǵa kirgizgen bolsa, Ájiniyaz atındaǵı Nókis mámleketlik pedagogikalıq institutı komandası 2-orın, Ózbekstan mámleketlik denetárbiya hám sport universiteti Nókis filialı komandası sıylı 3-orındı iyeledi.

2-fevral kúni basketbol boyınsha jarıslar er-jigitler arasında dawam etti. Qızǵın bellesiwler hám intrigalarǵa bay bolǵan jarısta Ózbekstan mámleketlik denetárbiya hám sport universiteti Nókis filialı komandası 1-orındı iyelep, kelesi basqıshqa jollama aldı. Jeńimpazlarǵa múnásip qarsılıq kórsetip, joqarı básekilik tuwdırǵan Ájiniyaz atındaǵı Nókis mámleketlik pedagogikalıq institutı komandası 2-orındı, al Berdaq atındaǵı Qaraqalpaq mámleketlik universiteti komandası sıylı 3-orındı bántledi.

Esletip ótemiz, jarıslar belgilengen keste tiykarında 1-5-fevral kúnleri basketbol, 10-15-fevral kúnleri voleybol, 20-25-fevral kúnleri stol tennisi, 1-5-mart kúnleri mini futbol, sonday-aq, 10-15-mart kúnleri aralıǵında shaxmat boyınsha ótkeriliwi belgilengen bolıp, oǵan joqarı oqıw orınlarınan ulıwma 448 student, sonnan 176 student-qız qatnasıwı kútilmekte.

Maǵlıwmat ornında atap ótiw kerek, «Studentler ligası» sport jarısları Ózbekstan Respublikası Prezidentiniń «Ǵalabalıq hám professional futboldı hár tárepleme rawajlandırıwdıń qosımsha ilajları haqqında»ǵı jáne «2026-jıl Ózbekstanda bolıp ótetuǵın 46-Dúnya júzilik shaxmat olimpiadasına kompleksli tayarlıq kóriw hám shaxmattı ǵalabalıq háreketke aylandırıwǵa baylanıslı ilajlar haqqında»ǵı qararları, sonday-aq, 2023-jıl 11-aprel kúni «Jaslar siyasatı tarawındaǵı jumıslardıń nátiyjeliligin arttırıw hám olar menen islesiw sistemasın bunnan bılay da jetilistiriw ilajları» boyınsha ótkerilgen videoselektor jıynalısında berilgen tapsırmalardıń orınlanıwın támiyinlew maqsetinde shólkemlestirilmekte.

NMPI baspasóz xızmeti.