Ájiniyaz atındaǵı Nókis mámleketlik pedagogikalıq institutında túrkiy xalıqlar ádebiyatınıń kórnekli wákili, ózbek ádebiy tiliniń tiykarın salıwshısı, shayır hám mámleketlik ǵayratker, ǵázzel múlkiniń sultanı Áliysher Nawayınıń tuwılǵanına 583 jıl tolıwı múnásibeti menen «Nawayı ádebiy miyrası hám ruwxıy qádiriyatlar» atamasında ilimiy-ámeliy konferenciya hám kórkem-ádebiy keshe bolıp ótti.

Ilajdı institut rektorı wazıypasın waqıtsha atqarıwshısı Quvondiq Qodirov kiris sózi menen ashıp berdi.

Konferenciyada instituttıń ózbek tili kafedrasınıń professorı, filologiya ilimleriniń doktorı G.Qurbaniyazov «Áliysher Nawayı – filolog», qazaq tili hám ádebiyatı kafedrasınıń docenti T.Tórtkúlbaeva «Nawayı hám Abaydıń danıshpanlıq oy-pikirleri», qaraqalpaq ádebiyatı kafedrasınıń docenti Q.Matimov «Áliysher Nawayı hám qaraqalpaq ádebiyatı», ózbek ádebiyatı kafedrasınıń oqıtıwshısı Z.Azilova «Nawayı shıǵarmalarınıń qaraqalpaqsha awdarmaları» atamalarında bayanatlar jasadı.

Áliysher Nawayınıń bay hám kóp qırlı dóretiwshiligi tek ǵana ózbek ádebiyatında emes, sonıń menen birge, dúnya ádebiyatında da salmaqlı orınǵa iye. Nawayı lirikalıq, epikalıq hám filosofiyalıq dóretpeleri menen XV ásir ádebiyatında tereń iz qaldırdı. Ullı shayırdıń shıǵarmaları ózi ómir súrip turǵan dáwirdiń ózinde Qıtaydan baslap Kishi Aziyaǵa shekem jetip bardı. Házirgi waqıtta da pútkil dúnya xalıqları onıń shıǵarmaların súyip oqıydı.

«Hamsa» dástanı Nawayı dóretiwshiliginiń eń biyik shıńı bolıp tabıladı. Bul shıǵarma ózbek ádebiyatınıń dańqın dúnyaǵa kórsetip, jáhán ádebiyatınıń eń jaqsı úlgileriniń birine aylandı.

Nawayınıń dóretiwshiligine názer awdarsaq, poeziyanıń 16 túrli janrında dóretiwshilik etkenligin kóriw múmkin. Bular ǵázzel, rubayı, tuyıq, fard, qita, muhalles, musaddes hám t.b. Usınday janrlarda Nawayı sıyaqlı dóretiwshilik etken shayırlar derlik joq. Ullı shayır qosıq jazǵanda tek ǵana ózbek tilinen emes, al basqa da tillerden nátiyjeli paydalanǵan.

Bayanatshılar tárepinen Áliysher Nawayınıń ádebiy miyrasların úyreniw, qaytadan baspadan shıǵarıw, xalıqqa jetkeriw jumısları ǵárezsizlik dáwirinde joqarı itibarda bolǵanlıǵın atap ótti.

Ilaj Túrkiy tiller fakultetiniń talantlı jasları atqarıwındaǵı Áliysher Nawayınıń ómiri hám dóretiwshiligi sáwlelengen kórkem-ádebiy bólim menen dawam etti.

NMPI baspasóz xızmeti.