Ózbekstan Respublikası Prezidentiniń 2022-jıl 21-iyun kúngi «Pedagogikalıq bilimlendiriw sapasın arttırıw hám pedagog kadrlar tayarlaytuǵın joqarı oqıw orınlarınıń jumısların bunnan bılay da rawajlandırıw ilajları haqqında»ǵı PQ-289-sanlı qararınıń 4-qosımshası menen Ájiniyaz atındaǵı Nókis mámleketlik pedagogikalıq institutı Tariyx fakultetine Nókis qalasındaǵı 6-sanlı ulıwma bilim beriw mektebi biriktirilgen edi. Usı qarar menen joqarı oqıw orınlarınıń fakultetleri tárepinen ózlerine biriktirilgen mekteplerde ámelge asırıwı tiyis bolǵan wazıypalar belgilep berilgen.

Qararda belgilengen wazıypalardan kelip shıǵıp, instituttıń tariyxtı oqıtıw metodikası kafedrası menen Nókis qalalıq 6-sanlı ulıwma bilim beriw mektebi arasındaǵı birge islesiw shártnaması hám birgelikte ámelge asırılatuǵın is-ilajlar rejesine muwapıq kafedra baslıǵı R.Bazarbaev, professor-oqıtıwshılar A.Sarıbaev, B.Turǵanov, R.Idrisov hám G.Akimniyazovalar tárepinen mektep oqıtıwshıların úziliksiz kásiplik rawajlandırıw máselesinde jaqınnan birge islesiw maqsetinde seminar-trening shólkemlestirildi. Seminar-treningde kafedra professor-oqıtıwshıları tárepinen mektep oqıtıwshıları menen birgelikte oqıw ádebiyatları, ilimiy maqalalar tayarlaw hám baspaǵa beriw boyınsha maǵlıwmatlar hám kórsetpeler berildi.

Seminar-trening sońında kafedra jámááti tárepinen mekteptiń pedagogika tarawına qızıǵıwshılıǵı bar oqıwshıları menen sáwbetlesiwler ótkerilip, olarǵa institut, ondaǵı baǵdarlar, jetiskenlikleri boyınsha maǵlıwmatlar berildi.

Ilaj barısında mektep oqıtıwshıları hám oqıwshıları ózlerin qızıqtırǵan sorawlarına juwaplar aldı.