Ájiniyaz atındaǵı Nókis mámleketlik pedagogikalıq institutı Baslawısh tálim fakultetinde tuwısqan qazaq xalqınıń Nawrız bayramınıń bası – Amal merekesine arnalǵan bayram keshesi bolıp ótti.

Bul kúni qazaq xalqı qıstan aman-esen shıqqanına, báhárge ayaq basıp, tuwısqan-tuwǵan, qońsı-qoba menen júzleskenine quwanıp, qol alısıp, tós qaǵısadı. Bir-birine degen arazlıq, ókpe-giyneni umıtıp, amanlıq tileydi.

Bayramdı 1-4-kurs studentleri este qalarlıqtay etip belgiledi.

Ilajda fakultet dekanı U.Seytjanova sózge shıǵıp, qazaq xalqınıń «Amal merekesi» kúni menen kelgen miymanlardı hám bárshe qatnasıwshılardı qutlıqladı.

Sonday-aq, bunday ilajlar túrli millet studentleri arasında tatıwlıqtı bekkemleytuǵınlıǵı haqqında aytıp ótti.

Keshe miymanı Qazaq milliy mádeniy orayınıń baslıǵı A.Umbetaev sózge shıǵıp bayram menen qutlıqladı hám shólkemlestiriwshilerge minnetdarshılıq bildirdi.

Bayramda qosıqlar, oyınlar, saxnalıq kórinisler, sonıń menen birgelikte, qazaq xalqınıń milliy dástúrleri bolǵan betashar, tusaw keser hám qız uzatıw kórinisleri kórsetildi. Sonday-aq, studentler tárepinen qazaq xalqınıń milliy taǵamları menen bezetilgen bayram dasturqanı kelgen miymanlarda úlken tásirler qaldırdı.

Ilaj sońında baslawısh tálim kafedrası baslıǵı Z.Qurbaniyazova sózge shıǵıp, bayram menen qutlıqlap, studentlerge hám shólkemlestiriwshilerge mazmunlı, ájayıp keshe ushın minnetdarshılıq bildirdi.