Ájiniyaz atındaǵı Nókis mámleketlik pedagogikalıq institutında qazaq tili hám ádebiyatı kafedrası hám Qaraqalpaqstan Respublikası Qazaq milliy mádeniy orayı tárepinen tuwısqan qazaq xalqınıń milliy bayramlarınıń biri bolǵan amal merekesi hám kórisiw kúnine arnalǵan «Xosh keldiń – Áz Nawrız!» atamasındaǵı ádebiy-kompoziciyalıq bayram keshesi shólkemlestirildi.

Ózbekstan – kóp milletli tatıw shańaraq. Házirgi waqıtta elimizde 130 dan aslam túrli millet hám xalıqlardıń wákilleri doslıqta, tatıwlıqta, awızbirshilikte ómir súrmekte.

Elimizde jasap atırǵan hár qıylı millet wákilleri Nawrız bayramı qarsańında óz milliyligi, ata-babalarınan miyras bolıp kiyatırǵan úrp-ádet hám dástúrleri, milliy kiyim-kenshekleri, sonıń menen birge, milliy taǵamların kórsetip, bayram tamashaların shólkemlestirip kelmekte.

Ulıstıń ullı kúni, jańa jıl, jańa kúnniń baslanıwı sıpatında belgilenetuǵın amal merekesi – kórisiw kúni tuwısqan qazaq xalqınıń ata-babalardan miyras bolıp kiyatırǵan qádiriyatlarınıń biri bolıp tabıladı.

Awızbirshilik hám tatıwlıqtıń simvolı esaplanǵan bul bayram kóp milletli Qaraqalpaqstan Respublikasında da keń túrde belgileniwi dástúrge aylanǵan.

– Amal merekesi yamasa kórisiw – aǵayin-tuwısqanlar tatıwlıǵı, xalıqlardıń awızbirshiliginiń kórinisi. Óytkeni, bul dástúr aǵayinler arasındaǵı tatıwlıqtı bekkemlep, tabıstıradı. Adamlar bir-birine jaqsılıqlar tilep, alǵıslar aytıladı, – deydi instituttıń qazaq tili hám ádebiyatı kafedrasınıń baslıǵı, docent Írıstı Quttımuratova.

Keshede Qaraqalpaqstan Respublikası Ministrler Keńesi Baslıǵınıń orınbasarı R.Nurazizov, institut rektorı wazıypasın waqıtsha atqarıwshısı Q.Qodirov sózge shıǵıp, oyanıw áyyyamı, Nawrız jarshısı bolǵan amal merekesi menen qutlıqlap, bul bayramnıń milletler aralıq tatıwlıqtı bekkemlewdegi áhmiyetine ayrıqsha toqtaldı.

Kóp milletli mámleketimizde xalıqlar arasındaǵı doslıqtı bekkemlew, ata-babalardan miyras bolıp kiyatırǵan qádiriyatlardı keleshek áwladlarǵa jetkeriw jolında pidayı xızmet etip atırǵan bir topar belsendilerge Ministrler Keńesi atınan húrmet jarlıqları hám bayram sawǵaları tapsırıldı.

Ilaj sheńberinde qazaq xalqınıń áwladtan-áwladqa ótip kiyatırǵan qol óneri úlgileri, milliy taǵamları, milliy kiyimleri kórgizbesi shólkemlestirilip, talantlı studentler atqarıwındaǵı qosıq-jırlar, milliy ayaq-oyınlar, aqınlar aytısı sıyaqlı saxnalıq kórinislerdi ózinde jámlegen ádebiy-kompoziciyalıq bayram keshesi menen dawam etti.

NMPI baspasóz xızmeti.