Xabarıńız bar, Ózbekstan Respublikası Bas ministriniń biyligine muwapıq, Nawrız ulıwma xalıqlıq bayramın múnásip túrde belgilew hám múbárek Ramazan ayın múnásip tárizde ótkeriw, máhálleler, xalıqtıń turaq jayları, qıyabanlar, ziyarat orınları, qábiristanlar hám balalar maydanshaların abadanlastırıw maqsetinde usı jıldıń 16-18-mart kúnleri «Abat hám payızlı máhálle – elimiz kórki» súreni tiykarında ulıwma xalıqlıq qayırqomlıq shembiligi ótkeriliwi belgilengen edi.

Búgin erte azannan baslap respublikamız boylap dawam etip atırǵan ǵalabalıq shembilikte Ájiniyaz atındaǵı Nókis mámleketlik pedagogikalıq institutınıń miynet jámááti hám student-jasları paytaxtımız Nókis qalasınıń «Hawa jolları», «Doslıq gúzarı», «Aq otaw», «Tuńǵısh qonıs», «Kók ózek», «Qumbız awıl» mákan puqaralar jıyınları aymaǵında abadanlastırıw hám kóklemzarlastırıw jumısların alıp barmaqta.

Sonıń menen birge, instituttıń fakultetleri átiraplarında da abadanlastırıw ilajları ótkerilmekte.

Institutta jumıs isleytuǵın xızmetkerler hám student-jaslar joqarı shólkemleskenlik penen, awızbirshilikli túrde tereklerdi, jol qaptalı tosıqların háklew, otırǵızılǵan nállerdiń, tereklerdiń átirapın jumsartıw, olarǵa suw quyıw, qorshaǵan ortalıqtı jabayı shóplerdiń qaldıqları hám shıǵındılardan tazalaw sıyaqlı jumıslardı atqarmaqta.

Ilaj sheńberindegi abadanlastırıw hám kóklemzarlastırıw jumısları dawam etpekte.

Esletip ótemiz, qayırqomlıq shembiliginde «Máhálleme 10 túp terek – meniń sawǵam» súreni tiykarında barlıq turaq jay massivleri hám máhállelerde klimat sharayatına iykemlesken hám suwǵarıw sistemasın esapqa alǵan halda terek nálleri otırǵızıladı.

NMPI baspasóz xızmeti.