Ájiniyaz atındaǵı Nókis mámleketlik pedagogikalıq institutında Ózbekstan hám Qaraqalpaqstan Respublikaları xalıq bilimlendiriw aǵlası, sport pánleri kafedrasınıń baslıǵı, professor Asqarbay Niyazovtıń 60 jıllıq yubileyine arnalǵan ilimiy-teoriyalıq konferenciya bolıp ótti.

Konferenciyada institut rektorı wazıypasın waqıtsha atqarıwshısı Quvondiq Qodirov sózge shıǵıp, yubiley iyesin qutlıqladı hám institut rektoratı atınan tayarlanǵan sawǵalardı tapsırdı.

Ilajda instituttıń Dene mádeniyatı fakulteti dekanı Amangeldi Utepbergenov professor Asqarbay Niyazovtıń ómiri hám miynet jolı haqqında bayanat jasadı.

Asqarbay Niyazov 1964-jılı 28-mart kúni Kegeyli rayonında dúnyaǵa kelgen. Ol mektepte oqıp júrgen waqıtlarınan baslap sporttıń boks túrine ayrıqsha ıqlas qoyıp, Nókis qalasındaǵı sport sekciyasına qatnasıp baslaǵan. Belgili trener Turdımurat Ótegenov qol astında shınıǵıwlar alıp barǵan qaharmanımız respublikalıq hám burınǵı Awqam kóleminde ótkerilgen jarıslarda jeńimpazlıqtı qolǵa kirgizdi.

1982-jılı Nókis mámleketlik universitetiniń Dene tárbiyası fakultetine oqıwǵa qabıllandı. Studentlik dáwirinde Qaraqalpaqstan sport jámiyetleri arasında ótkerilgen jarıslarda, sonday-aq, Ózbekstan chempionatlarında jeńimpaz boldı. Sonıń menen birge, Qırǵızstan Respublikasınıń Qarabalta qalasında ótkerilgen Orta Aziya hám Qazaqstan turnirinde, Rossiyanıń Ryazan qalasında ótkerilgen pútkil Awqamlıq turnirde, Nókis qalasında Sidney Jekson atına ótkerilgen xalıqaralıq turnirde birinshi orındı iyeledi.

Ol universitette oqıp júrgen waqtınan baslap jaslarǵa ustaz-trener sıpatında basshılıq etip, olardı joqarı dárejede shuǵıllandırıp, hár qıylı jarıslarda birinshilikti qoldan bermedi.

1986-jılı universitetti tabıslı pitkerip, usı jerde oqıtıwshı bolıp jumıs islep qaldı hám ustazlıq penen birgelikte trenerligin qosa alıp bardı.

1990-jılı Ájiniyaz atındaǵı Nókis mámleketlik pedagogikalıq institutı qayta shólkemlestirilgennen soń usı oqıw ornınıń Dene tárbiyası fakultetine jumısqa ótti. Bul jerde de oqıtıwshılıq penen birgelikte trenerlik kásibin qosa alıp barǵan Asqarbay Niyazov Ózbekstan hám burınǵı Awqamǵa atı belgili bolǵan Abıl Niyazov, Áliysher Áwezbaev, Ikram Allaniyazov, Aman Tajbaǵambetov hám basqa da sportshılarǵa ustazlıq etti.

Institutta jumıs baslaǵan dáwirinen usı kúnge shekem ol oqıtıwshılıqtan baslap aǵa oqıtıwshı, kafedra baslıǵı, dekan orınbasarı, institut sport klubınıń baslıǵı sıyaqlı juwapkerli lawazımlardı ádiwli atqardı. Búgingi kúnde sport pánleri kafedrasınıń baslıǵı sıpatında jumıs alıp barmaqta.

Ol miynet jolı dawamında ilimiy-izertlew jumıslarına da ayrıqsha dıqqat awdarıp, keleshek áwladlarǵa ilim, bilim berip, tájiriybe hám kónlikpelerin arttırıw maqsetinde 2 sabaqlıq, 1 monografiya, 3 oqıw qollanba, 9 oqıw-metodikalıq qollanbanı baspadan shıǵardı. Joqarǵı attestaciyalıq komissiyası dizimindegi ilimiy jurnallarda 200 den aslam ilimiy maqalaları jarıq kórdi.

Asqarbay Niyazovtıń jaslar tálim-tárbiyası hám ilimiy-pedagogikalıq baǵdardaǵı bahalı xızmetleri esapqa alınıp, oǵan Ózbekstan hám Qaraqalpaqstan Respublikaları Xalıq bilimlendiriw aǵlası kókirek belgileri tapsırılǵan bolsa, 2021-jılı Qaraqalpaqstan Respublikasında sport hám dene tárbiyası tarawında birinshi bolıp Joqarǵı attestaciyalıq komissiyası tárepinen professor ilimiy ataǵı berildi.

Konferenciyada respublikamızdıń sport tarawı pidayıları, yubiley iyesiniń ustazları, shákirtleri, birge islesip atırǵan, sonday-aq, Qazaqstan, Mongoliya hám basqa da mámleketlerdegi kásiplesleri sózge shıǵıp, Asqarbay Niyazovtıń ómiri, ámelge asırıp atırǵan jumısları, shákirtleriniń tabısları, respublikamız sport tarawındaǵı girewli ornı haqqında atap ótti.

Ilajǵa Qaraqalpaqstan Respublikası Sport ministri Ádilbek Allanazarov qatnastı.

NMPI baspasóz xızmeti.