Nókiste Ózbekstan mámleketlik emes kommerciyalıq emes shólkemleri milliy associaciyası Qaraqalpaqstan Respublikası aymaqlıq bóliminiń baslaması menen Nókis qalası prokuraturası, Qaraqalpaqstan Respublikası Ádillik ministrligi, «Yuksalish» háreketi Qaraqalpaqstan Respublikası aymaqlıq bólimi, Ájiniyaz atındaǵı Nókis mámleketlik pedagogikalıq institutı birgelikte «Korrupciyaǵa qarsı gúresiwde jámiyetlik qadaǵalaw hám onda mámleketlik emes kommerciyalıq emes shólkemlerdiń ornı» atamasında ilaj bolıp ótti.

Ilajǵa mámleketlik emes kommerciyalıq emes shólkemlerdiń qánigeleri, Ájiniyaz atındaǵı Nókis mámleketlik pedagogikalıq institutı student-jasları hám ǵalaba xabar qurallarınıń wákilleri qatnastı.

Ilajdı Ózbekstan mámleketlik emes kommerciyalıq emes shólkemleri milliy associaciyası Qaraqalpaqstan Respublikalıq aymaqlıq bólimi baslıǵı Q.Karimxojaev kiris sóz benen ashtı.

Bunnan keyin Nókis qalası prokurorınıń orınbasarı D.Allambergenov, Ájiniyaz atındaǵı Nókis mámleketlik pedagogikalıq institutınıń korrupciyaǵa qarsı gúresiw «Komplaens-qadaǵalaw» sistemasın basqarıw bólimi bas qánigesi G.Dálibaeva, Qaraqalpaqstan Respublikası Ádillik ministrliginiń huqıqıy málimleme boyınsha bas másláhátshisi N.Berdiniyazova, «Yuksalish» háreketi Qaraqalpaqstan Respublikası aymaqlıq bólimi bas qánigesi Sh.Usnatdinovlar shıǵıp sóylep, mámleketimizde korrupciyaǵa qarsı gúresiw boyınsha Prezidentimiz tárepinen qabıl etilip atırǵan pármanlar hám húkimetlik kararlardıń áhmiyetine toqtap ótip, rawajlanıwdıń jańa basqıshına qádem qoyıp atırǵan Ózbekstan ushın korrupciya illetiniń hár qanday túrdegi kórinisi ámelge asırılıp atırǵan reformalardıń nátiyjesine keri tásirin tiygizetuǵının atap ótti.

Atap ótilgenindey, korrupciyanıń aldın alıwda hám oǵan qarsı gúresiwde bir yaki eki mámleketlik uyımlardıń is-háreketleri menen unamlı nátiyjege erisip bolmaydı. Sonlıqtan, bul baǵdarda huqıq qorǵaw uyımları, mámleketlik shólkemler menen birgelikte barlıq puqaralarımız hám jámiyetlik qadaǵalaw institutlarınıń imkaniyatlarınan da keńnen paydalanıwımız zárúr.

Sonıń menen birgelikte, jámiyetlik qadaǵalawdı alıp barıwda ayrıqsha orın tutatuǵın mámleketlik emes kommerciyalıq emes shólkemlerdiń rolin bunnan bılay da kúsheytiw, orınlarda korrupciyaǵa qarsı gúresiw tarawındaǵı jumıslardıń barısın kompleksli úyreniw ayrıqsha áhmiyetke iye. Júz berip atırǵan mashqalalardı saplastırıw boyınsha tiykarlanǵan usınıslar tayarlap, olardı tiyisli uyımlarǵa usınıp barıw keleshektegi nızam joybarların tayarlawda, húkimetlik qarar hám baǵdarlamalardı islep shıǵıwda úlken áhmiyetke iye ekenligi atap ótildi.

Bunnan keyin mámleketlik emes kommerciyalıq emes shólkemlerdiń wákilleri, sonday-aq, student-jaslar jámiyetimiz rawajlanıwı ushın unamsız illet bolǵan korrupciyaǵa qarsı gúresiw boyınsha keń jámiyetshilik wákilleriniń rolin kúsheytiw, bul baǵdardaǵı úgit-násiyat ilajlarının nátiyjeliligin arttırıw boyınsha ózleriniń pikir-usınısların bildirdi.

Qaraqalpaqstan xabar agentligi