Usı jıldıń 24-aprel kúni Ájiniyaz atındaǵı Nókis mámleketlik pedagogikalıq institutında student-jaslardıń, sonıń ishinde, pitkeriwshi kurs studentleriniń bántligin támiyinlew maqsetinde bos jumıs orınları miynet yarmarkası bolıp ótti.

Miynet yarmarkasına Qaraqalpaqstan Respublikası Mektepke shekemgi hám mektep bilimlendiriwi ministrligi hám oǵan qaraslı qalalıq hám rayonlıq bólimleri wákilleri, Qaraqalpaqstan Respublikası Joqarı bilimlendiriw, ilim hám innovaciyalar ministrligi wákilleri, Qaraqalpaqstan Respublikası Kámbaǵallıqtı qısqartıw hám bántlik ministrligi, Qaraqalpaqstan Respublikası «Jumısqa márhamat» mono orayı, bir qatar joqarı oqıw orınları hám basqa bir qatar shólkemlerdiń wákilleri qatnastı.

«Karyera kúni» miynet yarmarkasın ótkeriwden gózlengen baslı maqset studentlerge miynet nızamshılıǵı haqqında túsinikler beriw, miynet bazarında sáykes vakanciyalardı izlew kónlikpelerin payda etiw, jumısqa ornalasıw ushın hújjetlerdi tayarlaw hám jumıs beriwshiler menen sáwbetlesiw usılların úyretiw, jumıs beriwshiler ushın institutta tayarlanıp atırǵan kadrlar potencialın tanıstırıw, oqıp atırǵan hám pitkeriwshi kurs studentleriniń bántligin támiyinlewge kómeklesiwden ibarat.

Miynet yarmarkasında tiykarǵı jumıs beriwshiler esaplanǵan Qaraqalpaqstan Respublikası Mektepke shekemgi hám mektep bilimlendiriw ministrligi sistemasındaǵı basqarma hám bólimler menen birgelikte isbilermenlik subektleri, mámleketlik hám mámleketlik emes mákeme, kárxana hám shólkemlerdiń wákilleri bos jumıs orınları menen qatnastı.

– Bıyılǵı oqıw jılında Nókis mámleketlik pedagogikalıq institutın ulıwma 3 mıń 854 pitkeriwshi, sonnan bakalavriattıń kúndizgi tálim baǵdarları boyınsha 2 mıń 576, sırtqı tálim baǵdarları boyınsha 1 mıń 259 student, al magistratura qánigelikleri boyınsha 19 magistrant pitkerip shıǵıwı kútilmekte. Miynet yarmarkasında 1-2-3-kurs studentleri menen birge usı pitkeriwshilerdiń de bántligin támiyinlew, olarǵa tiyisli tarawlar boyınsha jumıs orınlarına jollamalar beriw, jumıs beriwshiler menen shártnamalar dúziw jumısları alıp barıldı, – deydi instituttıń marketing hám studentler ámeliyatı bóliminiń baslıǵı Polat Xojaniyazov.

Ilaj sheńberinde institutta oqıp atırǵan studentlerdiń qolǵa kirgizgen jetiskenlikleri, ilimiy-pedagogikalıq hám óndirislik baǵdarda ámelge asırıp atırǵan jumısları, sonday-aq, fakultetlerde bilimlendiriw hám xalıq xojalıǵınıń basqa da tarawları ushın kadrlar tayarlaw baǵdarındaǵı joqarı nátiyjeler haqqında sóz etetuǵın kórgizbe shólkemlestirildi.

Instituttıń talantlı studentleri atqarıwındaǵı koncert baǵdarlaması qatnasıwshılar dıqqatına usınıldı.

NMPI baspasóz xızmeti.